ოფიციალურად: მადრიდის რეალმა კურტუას შემცვლელად კეპა არისაბალაგა დაიმატა

მადრიდის "რეალმა", რომელმაც სეზონი ორი წამყვანი ფეხბურთელის, მეკარე, ტიბო კურტუას და ცენტრალური მცველის, ედერ მილიტაოს ჯვარედინი მყესების გაწყვეტით დაიწყო, ბელგიელი გოლკიპერის შემცვლელად კეპა არისაბალაგა გაიფორმა.

იქიდან გამომდინარე, რომ ფეხბურთელისთვის ერთ-ერთი ყველაზე მძიმე ტრავმის მიღების გამო, ტიბო კურტუა გუნდს შესაძლოა სეზონის ბოლომდე ვერ დაეხმაროს, "ბლანკოსებმა" მის შემცვლელად ესპანელი მეკარე დაიმატეს.

28 წლის მეკარე სამშობლოში ლონდონის "ჩელსიდან" 1-წლიანი იჯარის წესით გადაბარგდა, ხოლო 2024 წლის ზაფხულში "რეალს" კონტრაქტის გამოსყიდვის უფლება არ ექნება.

კეპამ "ჩელსის" შემადგენლობაში გატარებულ 5 სეზონში უეფას ჩემპიონთა ლიგა, ევროპა ლიგა, ევროპის სუპერ თასი და მსოფლიოს საკლუბო ჩემპიონატი მოიგო.