მსოფლიოზე U20 მორაგბეების განრიგი ცნობილია

მსოფლიო რაგბმა სამხრეთ აფრიკაში გასამართი 2024 წლის 20-წლამდელთა ჩემპიონატის კალენდარი გამოაქვეყნა.

20-წლამდელთა მე-14 ჩემპიონატი 29 ივნისიდან 19 ივლისის ჩათვლით ქეიფთაუნში გაიმართება და საქართველო, რომელმაც შარშან, იმავე სამხრეთ აფრიკაში სარეკორდო მე-8 ადგილი დაიკავა, ბ ჯგუფში ირლანდიის, ავსტრალიისა და იტალიის წინააღმდეგ ითამაშებს. ა ჯგუფში საფრანგეთი, უელსი, ახალი ზელანდია და ესპანეთი, ხოლო გ ჯგუფში სამხრეთ აფრიკა, ინგლისი, არგენტინა და ფიჯი მოხვდნენ.

ჯგუფური ეტაპის შეხვედრები 29 ივნისს, 4 და 9 ივლისს გაიმართება. სამივე ჯგუფის გამარჯვებული და საუკეთესო მეორეადგილოსანი თასის ნახევარფინალში გადის; ორი მეორეადგილოსანი და ორიც საუკეთესო მესამეადგილოსანი მე-5-მე-8 ადგილებისთვის აგრძელებს ბრძოლას; დანარჩენი ოთხი გუნდი მე-9-მე-12 ადგილებს გაითამაშებს.

ტურნირი 29 ივნისს მოქმედი ჩემპიონის, საფრანგეთისა და დებიუტანტის – ესპანეთის (2023 წლის ალაფის გამარჯვებული) შეხვედრით გაიხსნება. უმცროსი ბორჯღალოსნები პირველ თამაშს „ეთლონ სთედიუმზე“ ავსტრალიის წინააღმდეგ ჩვენი დროით 18:30 საათზე გამართავენ; 4 ივლისს შარშანდელ ფინალისტ ირლანდიას 16 საათზე „დენი ქრეივენზე“ ერკინებიან; ჯგუფურ ეტაპს კი 9 ივლისს ასევე „დენი ქრეივენზე“ იტალიასთან ჯახით, 18:30 საათზე ასრულებენ.

ნახევარფინალები 14, ხოლო ფინალები 19 ივლისსაა ჩანიშნული.

წყარო: rugby.ge