ბორჯღალოსნები სამხრეთ აფრიკაში გაემგზავრნენ

5 წლის წინ რაგბი

4 წთ

კავკასიონი არენაზე ნიდერლანდების 48:15 დამარცხების შემდეგ, ბორჯღალოსნები სამხრეთ აფრიკაში გაემგზავრნენ, სადაც მსოფლიოს ჩემპიონ "სპრინგბოკსთან" 2 და 9 ივლისს ტესტ-მატჩებს გამართავენ. განვლილ შეხვედრაში მუხლი დაიზიანა და გაფართოებულ რაზმს გამოაკლდა მიხეილ გაჩეჩილაძე. "გაჩეჩილაძის მუხლის დაზიანების ხარისხი 48 საათის შემდეგ გახდება ცნობილი და ის სამხრეთ აფრიკაში ვერ წავიყვანეთ. ფეხი აწუხებს დავით მესხსაც. სამწუხაროდ, ჯერ კიდევ შეკრების დაწყებამდე ძალიან ბევრი ტრავმები გვქონდა და არსებული შემადგენლობიდან კიდევ რამდენიმე გამოცდილი მორაგბე გამოგვაკლდა" – ამბობს მთავარი მწვრთნელი ლევან მაისაშვილი. ის იმედოვნებს, რომ მომავალ შეხვედრას გუნდი შეთამაშებული შეხვდება და შეცდომები მინიმუმამდე იქნება დაყვანილი: "რამდენიმე წამყვანმა მოთამაშემ კოვიდი გადაიტანა და გასულ კვირაში ისინი ინდივიდუალურად ვარჯიშობდნენ, რის გამოც მოსამზადებელ პერიოდში პრობლემები გვქონდა. რადგან სამხრეთ აფრიკას პარასკევს ვეთამაშებით, მგზავრობის გათვალისწინებით, მოსამზადებლად შედარებით ნაკლები დრო გვექნება. დიდი ყურადღება დაეთმობა აღდგენას". "სპრინგბოკსმა" ბოლოს 2019 წლის 2 ნოემბერს, მსოფლიო თასის ფინალში ითამაშა, მას შემდეგ კი შეხვედრა არ ჩაუტარებია, თუმცა ბორჯღალოსნების თავკაცი მიიჩნევს, რომ ეს მათ თამაშზე დიდ გავლენას არ მოახდენს: "სამხრეთ აფრიკას, როგორც ერთიან გუნდს დიდი ხანია არ უთამაშია, თუმცა ამან ილუზიები არ უნდა შეგვიქმნას. მათ გაფართოებულ შემადგენლობაში 29 მსოფლიოს ჩემპიონია. მოთამაშეთა ნაწილი ევროპის წამყვან კლუბებში რეგულარულად თამაშობს და მუდმივი პრაქტიკა აქვთ, ნაწილი კი ადგილობრივ ფრანჩაიზებშია გადანაწილებული. ამიტომ, ვფიქრობ, რომ ნაკრების უთამაშებლობა მათ საშემსრულებლო ხარისხზე არ აისახება". "ნებისმიერი გუნდისთვის უდიდესი პატივია მსოფლიოს ჩემპიონთან ფინალური მატჩის შემდეგ შეხვედრა და მოხარული ვარ, რომ ეს პატივი წილად ჩვენ გვხვდა. პასუხისმგებლობა გუნდის ყველა წევრს სრულად აქვს გათვითცნობიერებული. ვეცდებით ჩვენი შესაძლებლობები მაქსიმალურად გამოვიყენოთ და სათამაშო ხარისხი ავიმაღლოთ და გამოცდილება შევიძინოთ".

ბორჯღალოსნების შემადგენლობა სამხრეთ აფრიკისთვის პირველი ხაზი: ბექა გიგაშვილი (23 კეპი, 10 ქულა), გურამ გოგიჩაშვილი (22 კეპი, 10 ქულა), ნიკოლოზ ხატიაშვილი (5 კეპი), ჯაბა ბრეგვაძე (66 კეპი, 25 ქულა), შალვა მამუკაშვილი (83 კეპი, 55 ქულა), გიორგი ჭყოიძე (16 კეპი, 5 ქულა), გიორგი მელიქიძე (28 კეპი, 15 ქულა), ლუკა ჯაფარიძე (უკეპო), გია ხარაიშვილი (5 კეპი); მეორე ხაზი: კოტე მიქაუტაძე (67 კეპი, 10 ქულა), ნოდარ ჭეიშვილი (31 კეპი), დავით გიგაური (11 კეპი, 5 ქულა), გიორგი ჯავახია (6 კეპი, 5 ქულა), მიხეილ ბაბუნაშვილი (უკეპო); მესამე ხაზი: ბექა საღინაძე (21 კეპი, 15 ქულა), თორნიკე ჯალაღონია (9 კეპი, 10 ქულა), გიორგი ცუცქირიძე (21 კეპი, 15 ქულა), ირაკლი ცხადაძე (4 კეპი), ილია სპანდერაშვილი (1 კეპი); 9: ვასილ ლობჟანიძე (58 კეპი, 50 ქულა), გელა აფრასიძე (34 კეპი, 24 ქულა), მიხეილ ალანია (5 კეპი); 10: თედო აბჟანდაძე (25 კეპი, 162 ქულა), გიორგი ბაბუნაშვილი (3 კეპი, 9 ქულა); 12-13: მერაბ შარიქაძე (კაპ. 77 კეპი, 60 ქულა), გიორგი კვესელაძე (34 კეპი, 25 ქულა), დემურ თაფლაძე (9 კეპი, 5 ქულა), ოთარ ლაშხი (უკეპო), ირაკლი სიმსივე (უკეპო); 11-14: აკაკი ტაბუცაძე (12 კეპი, 55 ქულა), მირიან მოდებაძე (16 კეპი, 35 ქულა); 15: დავით ნინიაშვილი (6 კეპი, 20 ქულა). წყარო: საქართველოს რაგბის კავშირი

ლევან მათეშვილი

სხვა სტატიები

6 ცვლილება ავსტრალიასთან მატჩში - საქართველოს ნაკრების შემადგენლობა ცნობილია

მერაბ შარიქაძე: "გვაქვს იმის პერსპექტივა, რომ პლეი-ოფში გავიდეთ..."