ვილი სანიოლი: "საქართველოს ნაკრები განახლებულია და უკეთეს ფორმაშია"
2 კვირის წინ
ქართული სპორტი
1 წთ
უეფას ერთა ლიგის B და C დივიზიონებს შორის გასამართ ორმატჩიანი დუელის საწყის მატჩში სომხეთთან შეხვედრამდე, საქართველოს ნაკრების მთავარი მწვრთნელი, ვილი სანიოლი პრესკონფერენციას მართავს და მოახლოებული მატჩის შესახებ საუბრობს.
"საქართველოსა და სომხეთის ნაკრებების მატჩს კავკასიურ დერბის უწოდებენ, რომელიც ორივე გუნდისთვის რთული შეხვედრა იქნება.
წინა შეკრებების დროს, მათ შორის ევროპის ჩემპიონატზე რამდენიმე ფეხბურთელი საქართველოს შიდა ჩემპიონატიდან ვიხმეთ, ახლა, მათ მხოლოდ მაღალი კონკურენციის გამო ვერ ვიძახებთ.
რამდენიმე წლის წინ, როცა ჯონ ვანტ სხიპი საბერძნეთის ნაკრების მწვრთნელი გახლდათ, ჩვენ მათ შევხვდით. ასევე, "აიაქსში" მისი მუშაობაც მახსოვს და ვთვლი, რომ ძალიან მაღალი დონის სპეციალისტია.
სომხეთის ნაკრებმა გასულ წლებში საკმაოდ დიდი წინსვლა აჩვენა. ამ ქვეყანას ჰყავს ისეთი ფეხბურთელი, როგორიც ჰენრიხ მხითარიანია. ამ ქვეყანას ფეხბურთი განსაკუთრებულად უყვარს. ეს ორი მეზობელი ქვეყანაა, მაგრამ ორმატჩიან დუელში ერთ-ერთი მათგანი იქნება წარმატებული. იმედი მაქვს, ეს საქართველოს ნაკრები იქნება.
საქართველოს ნაკრებში ტაქტიკური ცვლილებების დრო ნამდვილად მოდის. გასული წლების განმავლობაში, ის ფორმაცია, რომელსაც მივეჩვიეთ, ძალიან წარმატებული გამოდგა, მაგრამ ფეხბურთი მუდმივად იცვლება და ადაპტირება აუცილებელია.
ხვიჩა კვარაცხელია უნიკალური ფეხბურთელია და როცა ის ვერ გვეხმარება, ძალიან ძნელია, მაგრამ განსაკუთრებული მნიშვნელობა გუნდურ დისციპლინას ექნება. გასულ მატჩებში ეს კომპაქტურობა და ტაქტიკური მომზადება ცოტათი დავკარგეთ, მაგრამ შევეცდებით, რომ ის ძლიერი მხარეები დავიბრუნოთ, რომელიც ჩვენს გუნდს ახასიათებს. მატჩის დასაწყისს ძალიან დიდი მნიშვნელობა ექნება.
გასული წლების განმავლობაში, საქართველოს ნაკრებს განსაკუთრებულად დატვირთული გრაფიკი ჰქონდა და ამან ფეხბურთელების ფიზიკური და მენტალური გადაღლა გამოიწვია. ახლა, გუნდი ამ მხრივ, გაცილებით უფრო დამშვიდებულია და ყველაფერს ახლიდან ვიწყებთ.", - ამბობს ვილი სანიოლი.
საქართველოს ნაკრები სომხეთთან საწყის მატჩს 20 მარტს, ერევანში, ვაზგენ სარგისიანის სახელობის სტადიონზე გამართავს. შეხვედრა თბილისის დროით 21:00 საათზე დაიწყება.
სხვა სტატიები
