ორი გამარჯვების მიუხედავად: საქართველოს ნაკრების პოზიცია ფიფას რეიტინგში არ შეცვლილა

მარტის სანაკრებო პაუზის შემდეგ, FIFA-ს რეიტინგი განახლდა. მარტის მატჩებამდე, მსოფლიოს 210 ნაკრებისგან შემდგარ რეიტინგში საქართველო 68-ე პოზიციას იკავებდა, მაგრამ განახლებულ მონაცემებში არაფერი შეცვლილა.

მიუხედავად იმისა, რომ 2025 წლის მარტის თვეში საქართველოს ნაკრებმა ორი მატჩი, თანაც დიდი ანგარიშებით მოიგო, რეიტინგში ცვლილება არ შესულა და ჩვენი გუნდი უცვლელად, კვლავ იგივე საფეხურზე იმყოფება.

საქართველოს ნაკრებმა 20 და 23 მარტს, უეფას ერთა ლიგის B და C დივიზიონებს შორის გამართულ გადამწყვეტ მატჩებში სომხეთს 3:0 და 6:1 აჯობა. კავკასიურ დერბიში წარმატებული შეხვედრების შემდეგ, ვილი სანიოლის გაწვრთნილმა გუნდმა უეფას ერთა ლიგის რანგით მეორე დივიზიონში ადგილი შეინარჩუნა.

ჩვენმა მეტოქე სომხეთის ნაკრებმა მეასე პოზიციიდან 102-ე ადგილამდე დაიხია.

მსოფლიოს 2026 წლის ჩემპიონატის საკვალიფიკაციო ეტაპზე საქართველოს ნაკრების მეტოქეებს რაც შეეხებათ, ესპანეთი მესამედან მეორე პოზიციაზე აღზევდა, თურქეთმა 28-ე პოზიციიდან რეიტინგი 1 საფეხურით გაიუმჯობესა, ხოლო ბულგარეთმა 82-დან 85-ს პოზიციაზე ჩაიწია.

საქართველოს ნაკრები შემდეგ მატჩს 5 ივნისს, ამხანაგრური შეხვედრის სტატუსით, ფარერების კუნძულებთან, თბილისში გამართავს.