მერაბ ჟორდანია: "კვარაცხელია აიაქსს შევთავაზეთ, მაგრამ ჩათვალეს, რომ მზად არ იყო"

გამოცდილმა ქართულმა საფეხბურთო მენეჯერმა, მერაბ ჟორდანიამ, საქართველოს ნაკრებისა და "ნაპოლის" ვარსკვლავის, ხვიჩა კვარაცხელიას, რამდენიმე წლის წინ ამსტერდამის "აიაქსში" შესაძლო გადასვლის შესახებ ისაუბრა.

ვეტერან ქართველ ფეხბურთელს, მწვრთნელს და ქვეყნის ფეხბურთის ფედერაციის ყოფილ პრეზიდენტს, ნიდერლანდელი ჟურნალისტები სამშობლოში ეწვივნენ და მასთან ვრცელი ინტერვიუ ჩაწერეს, რომელშიც, მერაბ ჟორდანიამ სწორედ ნეაპოლელთა 77-ე ნომრის ამსტერდამულ გრანდში პოტენციური გადასვლის დეტალები გაიხსენა.

ხვიჩა კვარაცხელიასთვის 2022/23 წლების სადებიუტო სეზონი ფანტასტიკური გამოვიდა. 22 წლის ქართველმა ვარსკვლავმა “ნაპოლის” შემადგენლობაში ჩატარებულ 43 მატჩში 14 გოლის გატანა, 14 საგოლე პასის გაკეთება მოახერხა, 5 პენალტის მოპოვება შეძლო, გუნდს 33-წლიანი პაუზის შემდეგ, ისტორიაში მესამე სკუდეტოს მოგებაში დაეხმარა, სერია A-ს საუკეთესო ფეხბურთელად დასახელდა და სეზონის საუკეთესო გოლის ავტორი გახდა.

იტალიის მოქმედი ჩემპიონები 2023/24 წლების სერია A-ს სეზონს, 19 აგვისტოს, კიდევ ერთი ქართველი ფეხბურთელის, გიორგი კვერნაძის "ფროზინონესთან" სტუმრად გასამართი მატჩით გახსნიან.