ბუდუ ზივზივაძის ტრავმის დეტალები: როდის დაბრუნდება ქართველი მოედანზე?

საქართველოს ნაკრების ცენტრალურმა ფორვარდმა, ბუდუ ზივზივაძემ, გერმანიის ბუნდესლიგაში, "ვოლფსბურგთან" მოგებულ მატჩში (1:0), დამატებით დროში ტრავმა მიიღო.

Geo Team-ის ინფორმაციით, 31 წლის ქართველ ფეხბურთელს კოჭის იოგის დაზიანება აქვს და ამის გამო, რამდენიმე კვირის გამოტოვება მოუწევს. სავარაუდოდ, ბუდუ ზივზივაძე 2 კვირის განმავლობაში თამაშს ვერ შეძლებს, შესაბამისად, "ჰაიდენჰაიმის" მიერ ლევერკუზენის "ბაიერთან" და ფრანკფურტის "აინტრახტთან" გასამართი მატჩები გაუცდება, 19 აპრილს კი, მიუნხენის "ბაიერნთან" შეხვედრაში მოედანს უნდა დაუბრუნდეს.

ამ სეზონში, ბუდუ ზივზივაძეს "კარლსრუესა" და "ჰაიდენჰაიმის" შემადგენლობაში, გერმანიის მეორე და მთავარ ბუნდესლიგებში, ასევე ქვეყნის თასსა და კონფერენს ლიგაზე სულ 34 მატჩში აქვს მონაწილეობა მიღებული, 16 გოლი გატანილი და 7 საგოლე პასი გაკეთებული.