ლუკა გუგეშაშვილი კარიერას პაოკში გააგრძელებს

Geo Team ადასტურებს ინფორმაციას, რომელიც გასული თვეების განმავლობაში ბერძნულ მედიაში აქტიურად ვრცელდებოდა.

საუბარი საქართველოს ნაკრების მეკარის, ლუკა გუგეშაშვილის საბერძნეთის ერთ-ერთ ტიტულოვან გუნდში, სალონიკის "პაოკში" გადასვლასთან დაკავშირებითაა.

25 წლის ქართველი გოლკიპერი "პანსერაიკოსის" შემადგენლობაში თამაშობს და ამ სეზონში, საბერძნეთის ჩემპიონატში თავის პოზიციაზე ერთ-ერთი საუკეთესოა.

მხარეებს შორის შეთანხმება მიღწეულია და ქართველი მეკარე ახალ გუნდში შემდეგ სეზონში გადაბარგდება. "პაოკს" ქართველის ტრანსფერი 1 მილიონი ევრო დაუჯდება.

"დინამო თბილისის" აკადემიის აღზრდილი მეკარე პოლონური "იაგელონიას", "პოდლასას", ესპანური "გრანადას", გორის "დილას" და აზერბაიჯანული "ყარაბახის" შემადგენლობაში თამაშობდა. ქართველი მეკარე 3-ჯერ აზერბაიჯანის ჩემპიონი და 2-ჯერ თასის მფლობელი გახდა. ევრო 2024-ის შემდეგ ლუკა გუგეშაშვილი "პანსერაიკოსში" გადაბარგდა და ამ სეზონში, საბერძნეთის ჩემპიონატში მოგერიებული 97 ბურთით მეორე პოზიციას იკავებს.

"პაოკი" საბერძნეთის 4-გზის, მათ შორის მოქმედი ჩემპიონია, ახლა კი ჩემპიონატში ჩატარებული 26 ტურის შემდეგ დაგროვებული 46 ქულით მეოთხე პოზიციას იკავებს და ლიდერ პირეოსის "ოლიმპიაკოსს" 14 ქულით ჩამორჩება.