ლევან კორღალიძე: "მადლობა ქომაგობისთვის, ნახევარი საქმე კიდევ გასაკეთებელი გვაქვს"
4 თვის წინ
ქართული სპორტი
1 წთ
უეფას ევროპის კონფერენს ლიგის მეორე საკვალიფიკაციო ეტაპის საწყის მატჩში, ალბანურ "პარტიზანთან" (2:0) გამარჯვების შემდეგ, "იბერია 1999-ს" მთავარმა მწვრთნელმა, ლევან კორღალიძემ კომენტარი გააკეთა.
"გილოცავთ ამ გამარჯვებას. მთლიანად საქართველოს ვულოცავ, მაგრამ ჯერ ნახევარი გზაც არ გაგვივლია და რამდენიმე დღეში საპასუხო მატჩი გველოდება. ძალიან კარგი და ძლიერი გუნდია, რაც ამ მატჩშიც გამოჩნდა. წინ მეორე ბრძოლა გველოდება, შევეცდებით მაქსიმალურად მოვემზადოთ და ყველაფერი გავაკეთოთ იმისთვის, რომ შემდეგ ეტაპზე გავიდეთ. თანამედროვე ფეხბურთში, ვფიქრობ განსაკუთრებულად კომფორტული ანგარიში არ არსებობს.
მინდა მადლობა გადავუხადო სტადიონზე მოსულ გულშემატკივარს, მათგან ძალიან დიდი მხარდაჭერა ვიგრძენით და მე-12 მოთამაშის ფაქტორი დავინახეთ.
რიგ მომენტებში, ტონუსიდან ამოვარდნა გვეტყობოდა და ვფიქრობ, ფიზიკური მომზადების გაუმჯობესება გვჭირდება. ამ კუთხით, ვმუშაობთ და იმედი გვაქვს, საპასუხო მატჩისთვის მაქსიმალურად კარგ ფორმაში ვიქნებით.
28 რიცხვში საქართველოს დავით ყიფიანის სახელობის თასზე თამაში გვიწევს, მეორე დღეს გვაქვს ფრენა, 4 აგვისტოს კი უკვე საქართველოს ეროვნული ლიგის მატჩი გველის "თელავთან". რთული გრაფიკი გვაქვს, მაგრამ პროფესიონალები ვართ და საქმეს ასე უნდა მივუდგეთ. რა თქმა უნდა, უკეთესია, რომ სათასო მატჩი გადაგვედო და ალბანეთში უფრო მეტად დასვენებულები ჩავსულიყავით, მაგრამ არ ხერხდება.
საბა მამაცაშვილი ძალიან ნიჭიერი ფეხბურთელია და მას არაერთ პოზიციაზე თამაში შეუძლია. ჩემთვის, მწვრთნელისთვის ასეთი ფეხბურთელების ყოლა, რომლებსაც რამდენიმე პოზიციაზე თანაბრად კარგად თამაში შეუძლიათ, კომფორტია.
ვიცით, რომ არამხოლოდ "იბერია 1999-ს", არამედ მთლიანად საქართველოს წარმოვადგენთ და მნიშვნელოვანია, რომ კოეფიციენტი გავიუმჯობესოთ, რათა შემდეგ წელსაც საქართველოს ევროპულ ტურნირებზე ისევ 4 გუნდი ჰყავდეს და არა 3", - ამბობს ლევან კორღალიძე.
მიხეილ მესხის სახელობის სტადიონზე გამართულ მატჩში საქართველოს დავით ყიფიანის სახელობის თასის მოქმედი გამარჯვებულის მხრიდან გოლების გატანა შოთა ნონიკაშვილმა და შეიკნე სილამ მოახერხეს. საპასუხო შეხვედრა ალბანეთში 1 აგვისტოს გაიმართება და თბილისის დროით 22:00 საათზე დაიწყება.
სხვა სტატიები
.32.webp)
