გიორგი ქოჩორაშვილი: "ჩვენი თაობის ფეხბურთელები ახალგაზრდებისთვის სამაგალითო უნდა გავხდეთ"
1 თვის წინ
ქართული სპორტი
1 წთ
საქართველოს ნაკრებისა და "ლევანტეს" ცენტრალური ნახევარმცველი, გიორგი ქოჩორაშვილი ქვეყნის მთავარი გუნდის 2023/24 წლების სეზონის საუკეთესო დებიუტანტად დასახელდა.
ამ აღიარების შემდეგ, 25 წლის ქართველი ფეხბურთელი სოციალურ ქსელში პოსტს აქვეყნებს.
"გახარებული ვარ ეროვნული ნაკრების საუკეთესო დებიუტანტის პრიზის დაუფლებით. იმედია, ყოველწლიურად მძაფრი კონკურენცია იქნება ამ პრიზისთვის და ეროვნული ნაკრები მუდმივად მიიღებს ხარისხიან შევსებას. ძალიან მომწონს ქანდაკების ვიზუალი, საკულტო ფილმ ,,ფეოლადან'' ყველასთვის საყვარელი პერსონაჟის ხვედელიძის ფიგურა. დიდი მადლობა ლევან ვარდოსანიძესა და თემურ ლომიძეს ნამუშევრისთვის.
ეს პრიზი ეკუთვნის ყველა ჩემს გულშემატკივარს: ჩემს ოჯახს, სანდრას, მწვრთნელებს, თითოეულ თანაგუნდელს და ნაკრების შტაბის თითოეულ წევრს. და რა თქმა უნდა, ჩვენს საუკეთესო გულშემატკივარს, რომლის მხარდაჭერას ყოველთვის ვგრძნობთ!
ვულოცავ მამარდას დამსახურებული პრიზის მიღებას! დარწმუნებული ვარ, ამ ტიტულს კიდევ არაერთხელ მოიგებს, უკვე პრემიერლიგასა და ჩემპიონთა ლიგაზე ჩატარებული უმაღლესი დონის სეზონების გამო.
ვულოცავ ბატონ მურთაზ ხურცილავას იმ ღვაწლის დაფასებას, რაც მან ქართული ფეხბურთისა და მის შემდგომ თაობებში ფეხბურთის სიყვარულის გაღვივებისთვის გააკეთა. იმედია, ჩვენი თაობა ღირსეულად გადაიბარებს უფროსი თაობების ესტაფეტას და თითოეული ბავშვისთვის ვიქნებით მაგალითი, რომ ვიყოთ მეტი ვიდრე ფეხბურთელი!
ძალიან დიდი მადლობა სარბიელსა და მის რედაქციას, ყველაზე ძველი, 1993 წლიდან არსებული და პრესტიჟული გამოკითხვის ორგანიზებისთვის. ასევე, გამოკითხვაში მონაწილე თითოეულ ჟურნალისტს. თქვენ ხართ ის ადამიანები, რომელთა ობიექტური კრიტიკა ძალიან საჭიროა პრობლემების შეფასებისა და განვითარებისთვის. შესაბამისად, თქვენგან ქებასა და დაფასებასაც სხვა ფასი აქვს.
წარმატება ქართულ ფეხბურთს! ძალა ჩვენშია!
კიდევ ერთხელ, გულითადი მადლობა ,,სარბიელს'', თითოეულ ორგანიზატორსა და მონაწილეს!", - წერს გიორგი ქოჩორაშვილი სოციალურ ქსელში.
გიორგი ქოჩორაშვილი ოქტომბრის სანაკრებო მატჩების შემდეგ "ლევენტეში" ბრუნდება და შემდეგ შეხვედრას მისი გუნდი ლა ლიგა 2-ში, მეათე ტურის ეგიდით, ვალენსიურ დერბიში "კასტელონთან" გამართავს. ესპანეთის საფეხბურთო ჩემპიონატის რანგით მეორე ლიგაში "ლევანტე" საპლეიოფო ზონაში იმყოფება.
სხვა სტატიები
