გიორგი მამარდაშვილმა ნეტოს გადაასწრო და ისტორიულ შედეგებს უახლოვდება

საქართველოს ნაკრებისა და "ვალენსიას" მეკარეს, გიორგი მამარდაშვილს ბრწყინვალე სეზონი აქვს. გარდა იმისა, რომ ის ესპანეთის ლა ლიგის მეკარეებს შორის ყველაზე ძვირადღირებულია (35 მილიონი ევრო Transfermarkt-ის მონაცემებით), მას გუნდის ისტორიაში თავის პოზიციაზე მოთამაშეთა საუკეთესო შედეგების გაუმჯობესების შანსი აქვს.

კონკრეტულად, საქმე ისაა, რომ გიორგი მამარდაშვილმა ამ მომენტისთვის, 2023/24 წლების სეზონში უკვე 11 მატჩში კარის უსაფრთხოება მშრალად შეინახა. "ვალენსიას" ოფიციალური გვერდის მიერ გავრცელებული სტატიის მიხედვით, მამარდაშვილმა რამდენიმე მეკარის მიერ ნაჩვენები შედეგი გააუმჯობესა, მათ შორის ნეტო მურარასი (2017/18 წლების სეზონში), რომელიც შემდეგ "ბარსელონაში" გადაბარგდა, ახლა კი "ბორნმუთის" მეკარე გახლავთ.

რაც შეეხება უახლოეს შედეგებს, რეკორდსმენი ამ მხრივ ლეგენდარული სანტიაგო კანისარესი გახლავთ, რომელმაც ერთ სეზონში კარის მშრალად შენახვა 20-ჯერ მოახერხა. იქიდან გამომდინარე, რომ ლა ლიგის დასრულებამდე კიდევ 8 ტურია დარჩენილი აღნიშნული შედეგის გამეორება მიმდინარე სეზონში ფიზიკურად შეუძლებელია, თუმცა 23 წლის ქართველს მეორე პოზიციაზე გადასვლა შეუძლია. ამჟამად, მეორე ადგილზე გიორგი მამარდაშვილის მწვრთნელი, ხოსე მანუელ ოჩოტორენა ლა ლიგის 1988/89 წლების სეზონში 16-ჯერ მშრალად შენახული კარის მაჩვენებლით იმყოფება.