ევროპის ჩემპიონატის შემდეგ 5 ქართველი ფეხბურთელის სატრანსფერო ღირებულება გაიზარდა

ევროპის ჩემპიონატის დასრულების შემდეგ, Transfermarkt-მა ფეხბურთელების სატრანსფერო ფასები განაახლა. საქართველოს ეროვნული ნაკრების 5 ფეხბურთელის ღირებულება გაიზარდა.

• პირველ რიგში აღსანიშნავია ის ფაქტი, რომ საქართველოს ეროვნული ნაკრებისა და ,,ვალენსიას'' მეკარის, გიორგი მამარდაშვილის ღირებულება 2024 წლის 7 ივნისის შემდეგ 10 მილიონი ევროთი გაიზარდა და 45 მილიონი ევრო გახდა. შედეგად, მსოფლიოს ყველაზე ძვირადღირებულ მეკარეებს შორის მამარდამ პირველ ადგილზე გადაინაცვლა. გარდა ამისა, ქართველი მეკარე ,,ვალენსიას'' ყველაზე ძვირადღირებულ ფეხბურთელადაც რჩება.

• გიორგი მამარდაშვილს გარდა, საქართველოს ეროვნული ნაკრებისა და "აპოელის" მცველ - ლაშა დვალსაც სატრანფერო ღირებულება მოემატა. ევროპის ჩემპიონატამდე, მისი ღირებულება €900 000 ევრო იყო, ახლა კი მისი ღირებულება €1 მილიონ 500 ათასი ევროა

• მილიონნახევრით გაიზარდა საქართველოს ეროვნული ნაკრებისა და "ლევანტეს" ნახევარმცველის - გიორგი ქოჩორაშვილის ფასიც. ევროპის ჩემპიონატამდე ქოჩორას ღირებულება €1 მილიონი ევრო იყო, ახლა კი მისი სატრანსფერო ღირებულება €2.5 მილიონ ევროს შეადგენს.

• 400 ათასი ევროთი გაიზარდა ოთარ კაკაბაძის ფასიც და ახლა მისი ღირებულება ზუსტად €1 მილიონ ევროს შეადგენს. ევროპის ჩემპიონატამდე მისი სატრანსფერო ღირებულება €600 ათას ევროს შეადგენდა

• და ბოლოს - 2024 წლის ევროპის ჩემპიონატის თანაბომბარდირისა და საქართველოს ნაკრების ერთ-ერთი ლიდერის - გიორგი მიქაუტაძის სატრანსფერო ღირებულება €5 მილიონი ევროთი გაიზარდა და ახლა მისი ღირებულება €20 მილიონ ევროს შეადგენს.

შეგახსენებთ, რომ საქართველოს ნაკრებმა პირველ, ისტორიულ ევროპის ჩემპიონატზე დიდი სენსაცია მოახდინა და ჯგუფური ეტაპი პორტუგალიასთან მოპოვებული გამარჯვებით დაძლია. "ჯვაროსნები" 1/8-ფინალში ესპანეთთან 1:4 დამარცხდნენ და ასპარეზობა დაასრულეს.