ოთარ თანზილოვმა მალკოლმ უელმეიქერი ულამაზესი ნოკაუტით დაამარცხა

ლას-ვეგასში, „Meta Apex“-ში გამართულ UFC Vegas 122-ის ღონისძიებაზე, ქართველმა ოთარ თანზილოვმა, ამერიკელი მალკოლმ უელმეიქერი მეორე რაუნდის ნოკაუტით დაამარცხა და UFC-ში თავისი პირველი გამარჯვება მოიპოვა. (პირველი ბრძოლა 20 ივნისს გამართა და მსაჯების გადაწყვეტილებით დამარცხდა).

ბრძოლა და რაც ყველაზე მნიშვნელოვანია ფინალი, ნამდვილად სანახაობრივი გამოვიდა - მიუხედავად იმისა, რომ უელმეიქერი ამ საღამოს ზედიზედ ორი მარცხით შეხვდა, ბუკმეიკერებისგან მაინც ფავორიტად ითვლებოდა.

ქართველი მებრძოლი პირველივე წამებიდან აქტიური იყო და მეტოქის დარტყმებს არ მორიდებია. მართალია, პირველი რაუნდის შუაში უელმეიქერმა კორპუსში წარმატებული დარტყმებით სირთულეები შეუქმნა თანზილოვს და თითქმის ვადაზე ადრე დასრულებასთანაც იყო ახლოს, მაგრამ ქართველმა დროული 'თეიქდაუნები' გამოიყენა სიტუაციის განსამუხტად და კონტროლის დროის მოსაპოვებლად.

მეორე რაუნდის კულმინაცია და ნოკაუტი

მეორე რაუნდის დასაწყისში უელმეიქერმა აქტიურობა განაგრძო, თუმცა თანზილოვმაც უპასუხა. ბრძოლის ბედი ზუსტმა და მახვილგონივრულმა მომენტმა გადაწყვიტა: ქართველმა ახლო მანძილიდან ფეხით თავის არეში (Head Kick) უძლიერესი დარტყმა მიაყენა მეტოქეს, რის შემდეგაც უელმეიქერი უგონოდ დაეცა. თანზილოვმა დარტყმების წარმატებული სერიით დაასრულა ეპიზოდი და მსაჯმაც ბრძოლა დროულად შეაჩერა.