"ამ ბრძოლაში გამარჯვებული მე ვიქნები" - ილია თოფურია

მადრიდში მდებარე პრადოს ეროვნულ მუზეუმში ფილმ "ნაპოლეონის" პრემიერა გაიმართა. აღნიშნულ ჩვენებაზე უამრავი ცნობილი სახე იყო მიწვეული - რიდლი სკოტი, ხოაკინ ფენიქსი და სხვები. ბუნებრივია ამ საღამოს ილია თოფურიაც არ გამოაკლდებოდა, რომელიც თებერვალში UFC-ის საჩემპიონო ქამრისთვის იბრძოლებს.

MMA-ს ვარსკვლავმა ჟურნალისტების კითხვებსაც უპასუხა და მის მომავალ ორთაბრძოლაზე ისაუბრა. ქართველი მებრძოლი თავის გამარჯვებაში დარწმუნებულია და ამბობს, რომ ვოლკანოვსკის ჩემპიონის ქამარს წაართმევს.

ილია თოფურია პირველი ქართველი იქნება, რომელიც UFC-ში სატიტულო ორთაბრძოლას ჩაატარებს. თოფურიას მოწინააღმდეგე ავსტრალიელი ჩემპიონი ალექს ვოლკანოვსკი იქნება. აქვე იმასაც გეტყვით, რომ თოფურიასა და ვოლკანოვსკის ორთაბრძოლა 2024 წლის თებერვალში არის ჩანიშნული. სხვადასხვა გამოცემები იუწყებიან, რომ მათი დაპირისპირება ესპანეთში შედგება.

შეგახსენებთ, რომ თოფურიას კარიერაში 14, UFC-კი 6 გამარჯვება აქვს. ,,მატადორმა” ბოლო ბრძოლა 24 ივნისს, ფლორიდაში ჩაატარა, სადაც ჯოშ ემეტი მსაჯების ერთპიროვნული გადაწყვეტილებით დაამარცხა.