თორნიკე შენგელიას 19 ქულა და ვირტუსის გამარჯვება სერია A-ში

იტალიის საკალათბურთო ჩემპიონატის მე-8 ტურში, "ვირტუს ბოლონიამ" "სასარი" მიიღო და მეტოქე 95:85 დაამარცხა. მატჩის გადამწყვეტი მომენტი მესამე მეოთხედში დადგა, სწორედ აქ მიიღო ვირტუსმა 14-ქულიანი უპირატესობა, თანაც ისე, რომ სასარის კალათში 37 ქულა ჩავარდა.

სტუმრები დიდ შესვენებაზე 4-ქულიანი უპირატესობით გავიდნენ, თუმცა მესამე მეოთხედის ჩავარდნა წაგების ფასად დაუჯდათ, მატჩის ბოლო მეოთხედი საოცრად დაბალშედეგიანი გამოვიდა, გუნდებმა ერთმანეთის კალათში მხოლოდ 7-7 ქულა ჩააგდეს.

პარკეტზე 27 წუთი გაატარა თორნიკე შენგელიამ, ჩვენი ნაკრების კაპიტანი ვირტუსის რიგებში ყველაზე შედეგიანი იყო: 19 ქულა, 3 მოხსნა, 1 შედეგიანი გადაცემა, ერთი დაფარება და ერთიც ჩაჭრა.თორნიკემ 8-დან 5 ორქულიანი ჩააგდო, საჯარიმოს ხაზიდან კი 10-ჯერ ისროლა და მხოლოდ 1 იყო არაზუსტი.

ბოლონიელები სატურნირო ცხრილის მეორე ადგილზე არიან (7 მოგება და 1 მარცხი), მომმდევნო ტურის შეხვედრას კი 1-ელ დეკემბერს, სტუმრად, "ბრეშას" წინააღმდეგ ჩაატარებენ.