ლებრონ ჯეიმსი კალათბურთის ისტორიის გადაწერას აგრძელებს

NBA-ის რეგულარული სეზონის მატჩში "ლოს ანჯელეს ლეიკერსმა" "ვაშინგტონ უიზარდს" უმასპინძლა და მეტოქე 111:88 დაამარცხა.

ლებრონ ჯეიმსმა საღამო 21 ქულით, 10 მოხსნით, 13 შედეგიანი გადაცემით, ორი ჩაჭრითა და ერთი დაფარებით დაასრულა. ლეგენდამ 36 წუთში 18-დან 8 სროლა გამოიყენა. შესრულებული სამმაგი დუბლით ლებრონმა NBA-ის ისტორია გადაწერა. ის გახდა მეორე კალათბურთელი ისტორიაში (კარლ მელოუნის შემდეგ), ვინც 40 წლის ასაკში შეძლო სამმაგის შესრულება.

მიუხედავად იმისა, რომ ჯეიმსს 40 წელი დეკემბერში შეუსრულდა, წარმოუდგენელ სეზონს ატარებს. ის საშუალოდ 23.7 ქულას, 7.5 მოხსნას და 9 პასს აგროვებს ერთ მატჩში. ჩატარებულ 38 შეხვედრაში საშუალო დისტანციიდან 51.3%-ით, ხოლო პერიმეტრიდან 39.8%-ით ისვრის. ჯეიმსმა უკვე მე-9 სამმაგი შეასრულა და ამ მაჩვენებლით ლიგაში მეორეა (ნიკოლა იოკიჩს 19 სამმაგი დუბლი აქვს).