კობი ბრაიანტის საჩემპიონო ბეჭედი აუქციონზე რეკორდულ ფასად გაიყიდა

"ლოს ანჯელეს ლეიკერსის" ლეგენდარული მოთამაშის კობი ბრაიანტის 2000 წლის NBA-ს საჩემპიონო ბეჭედი, რომელიც მან მამამისს აჩუქა აუქციონზე რეკორდულ 927 200 დოლარად გაიყიდა.

წინა რეკორდი ბილ რასელის მიერ 1957 წელს მოგებული საჩემპიონო ბეჭდის ფასი იყო, აღნიშნული ჯილდო 2021 წელს 705 000 დოლარად გაიყიდა.

ბეჭედზე სულ 40 ბრილიანტია და დამზადებულია 14 კარატიანი ოქროთი, მასზე გამოსახულია "ლეიკერსის" ლოგო, მეორე მხარეს კობის გვარი და ლოს ანჯელესური გუნდის რეგულარულ სეზონში მოგება/წაგების მაჩვენებელი (67-15). ქვედა მხარეს გამოსახულია ბრაიანტის 8 ნომერი, რომელიც მას კარიერის პირველ ნახევარში ეცვა.

2000 წელს ლეიკერსის მიერ მოპოვებული ტიტული ბრაიანტის ხუთი ჩემპიონატიდან პირველი იყო. ლოს ანჯელესურმა გუნდმა "ინდიანა პეისერსი" ექვს მატჩში დაამარცხა.