ევრობასკეტის საკვალიფიკაციო მატჩებისთვის მოსამზადებლად ეროვნულმა ნაკრებმა შეკრება დაიწყო

საქართველოს ეროვნული ნაკრების მთავარმა მწვრთნელმა, ალეკსანდარ ჯიკიჩმა გაფართოებული შემადგენლობა დაასახელა, საიდანაც მომავალი სანაკრებო თამაშებისთვის 14 მოთამაშეს შეარჩევს. სწორედ მათგან, თამაშების წინა დღეს დაასახელებს მთავარი მწვრთნელი იმ 12 კალათბურთელს, რომლებიც ოფიციალურ მატჩებში მიიღებენ მონაწილეობას. შეგახსენებთ, რომ საქართველოს ეროვნულ გუნდს 21 და 24 ნოემბერს ევრობასკეტ 2025-ის საკვალიფიკაციო ტურნირის მატჩები ელის. ჩვენი ნაკრები 3 დღის ინტერვალით ორივე მატჩს ფინეთთან გამართავს. ჯიკიჩის გაწვრთნილი გუნდი 21 ნოემბერს ჰელსინკიში ითამაშებს, 24-ში კი ფინეთს თბილისში დაუპირისპირდება.

ეროვნულმა ნაკრებმა შეკრება არასრული შემადგენლობით – 11 ნოემბრიდან დაიწყო. 3 დღის განმავლობაში ალეკსანდარ ჯიკიჩი ნაკრებს დიღმის არენაზე ავარჯიშებს, ხოლო ფინეთში გამგზავრებამდე ბოლო 3 დღეს გუნდი თბილისი არენაზე მოემზადება. ეროვნული გუნდი ფინეთში 18 ნოემბერს გაემგზავრება და მზადებას ჰელსინკიში განაგრძობს, სადაც ნაკრებს ესპანეთში მოთამაშე ლეგიონერები – გიორგი შერმადინი, ბექა ბურჯანაძე და კაპიტანი, თორნიკე შენგელია შეუერთდებიან. ფინეთში შეურთდება ნაკრებს ორი ლეგიონერი, ჯო ტომასონი და კამარ ბოლდუინი.

ნაკრებში 3 ახალწვეულია: გიორგი სულაბერიძე, ივანე მეგენეიშვილი და მათე ყავლაშვილი.

ის, თუ რომელი კალათბურთელები მოხვდებიან ფინეთთან მატჩის 12-კაციან განაცხადში, ალეკსანდარ ჯიკიჩი თბილისური შეკრების ბოლოს გადაწყვეტს, რის შემდეგაც, 18 ნოემბერს, საქართველოს ნაკრები ჰელსინკიში გაემგზავრება, სადაც ფინეთთან დაპირისპირებამდე მოსამზადებლად კიდევ 2 დღე ექნება.

გაფართოებული შემადგენლობა ასე გამოიყურება:

• კამარ ბოლდუინი ("ბასკონია")

• ჯო ტომასონი ("გრან კანარია")

• რატი ანდრონიკაშვილი ("ბეფ რიკა")

• გიორგი ოჩხიკიძე ("ქუთაისი")

• ლუკა ლიკლიკაძე ("ორბი")

• ლუკა მაზიაშვილი ("ამრა გაგრა")

• მათე ხატიაშვილი ("ბასკონია" U18)

• მათე ყავლაშვილი ("თსუ")

• დუდა სანაძე ("ანორთოსისი")

• სანდრო სანაძე ("მარგვეთი")

• დავით კაკუშაძე ("ვსა")

• კახაბერ ჯინჭარაძე ("ალ-რაიანი")

• ალექსანდრე ფევაძე ("თსუ")

• გიორგი სულაბერიძე ("ქუთაისი")

• თორნიკე შენგელია ("ვირტუს ბოლონია")

• ბექა ბურჯანაძე ("ლეიმა კორუნა")

• გიორგი კორსანტია ("ქუთაისი")

• ილია ლონდარიძე ("ბათუმი")

• ივანე მეგენეიშვილი ("ივერიონი")

• გიორგი შერმადინი ("ტენერიფე")

• გიორგი ბაქრაძე ("დელტა")

საქართველოს კალათბურთის ეროვნული ფედერაცია