EuroBasket 2025 | 16-წლამდე საკალათბურთო ნაკრები ურთულეს ჯგუფში მოხვდა

საქართველოს 16-წლამდელთა საკალათბურთო ნაკრები, თურქეთში გასამართი ევრობასკეტის ურთულეს ჯგუფში მოხვდა. ქართველები C ჯგუფში იასპარეზებენ და ოპონენტები ესპანეთი, გერმანია და სერბეთი იქნებიან. აღსანიშნავია, რომ 2024 წლის A დივიზიონის ჩემპიონატზე ესპანეთი ფინალში დამარცხდა საფრანგეთთან, ხოლო სერბეთი მესამეადგილოსანი გახდა (გერმანიამ მე-10 ადგილი დაიკავა).

2025 წლის ჩემპიონატი თურქეთში გაიმართება, ჯგუფური ეტაპის თამაშები სტარტს სტამბოლში 8 აგვისტოს აიღებს, ტურნირი კი 16 აგვისტოს დაიხურება.

საბერძნეთში, 2024 წელს გამართულ ჩემპიონატზე ქართველებმა A დივიზიონში ადგილი შეინარჩუნეს. მონაწილე 16 გუნდიდან ჩვენმა ნაკრებმა მე-13 ადგილი დაიკავა და გადამწყვეტ შეხვედრაში პოლონეთს მოვუგეთ (75:57). A დივიზიონში ადგილები სწორედ პოლონეთმა, ბულგარეთმა და ხორვატიამ დაკარგეს.