სკოულზი ბექჰემის მანჩესტერ იუნაიტედის მფლობელად მოსვლას მხარს უჭერს
„რომასთან“ გამარჯვების მიუხედავად, „მანჩესტერ იუნაიტედის“ გარშემო ვითარება კვლავ დაძაბულია. კლუბის ლეგენდარულმა ნახევარმცველმა, პოლ სკოულზმა, თანაგუნდელ დევიდ ბექჰემს მხარი დაუჭირა და განაცხადა, რომ მას შეუძლია სათავეში ჩაუდგეს გაერთიანებას, რომელიც „ოლდ ტრაფორდზე“ გლეიზერებისა და სერ ჯიმ რეტკლიფის ეპოქას დაასრულებს.
გლეიზერების ოჯახი კლუბის საკონტროლო პაკეტს 2005 წლის მაისიდან ფლობს, ხოლო ბრიტანელმა მილიარდერმა ჯიმ რეტკლიფმა 2024 წლის დასაწყისში აქციების 27.7 პროცენტი შეიძინა და საფეხბურთო ოპერაციების მართვა გადაიბარა.
პოდკასტ The Good, The Bad and The Football-ში სკოულზმა ისაუბრა:
„ეს მფლობელები საკმარისად კარგები არ გამოდგნენ. ვიცი, რომ ჯიმ რეტკლიფი კლუბში მხოლოდ ორწელიწად-ნახევარია, მაგრამ ჯერჯერობით არაფერი გამოვიდა, ყველამ ვიცით, რა განწყობაა კლუბში გლეიზერების მიმართ, ამიტომ ნებისმიერი ვარიანტის განხილვისთვის მზად ვარ, ბექჰემს ვიცნობ და ის მართლაც კარგი კანდიდატურაა“ - პოლ სკოულზი
კლუბის კიდევ ერთმა ყოფილმა ფეხბურთელმა, ნიკი ბატმა, სერიოზული ფინანსური ბარიერების შესახებ ისაუბრა. მისი თქმით, მთავარი პრობლემა გლეიზერების მიერ დაწესებული არარეალური ფასია, რადგან ისინი კლუბს დაახლოებით 8 მილიარდ ფუნტად აფასებენ. ბატმა ეჭვი გამოთქვა, რომ ამჟამად „იუნაიტედი“ ამხელა თანხა არ ღირს, განსაკუთრებით იმ ფონზე, როდესაც გუნდი ჩემპიონთა ლიგის მიღმა რჩება და კომერციული შემოსავალიც მცირდება.
საშინაო ასპარეზზე „წითელი ეშმაკების“ საქმეები მართლაც ცუდად მიდის. მაიკლ კერიკის გაწვრთნილი გუნდი პრემიერ ლიგის ცხრილში მე-17 ადგილს იკავებს და ცხრა შეხვედრაში მხოლოდ შვიდი ქულა აქვს მოპოვებული, რაც ევროპულ ტურნირებზე მოხვედრის დიდ საფრთხეს ქმნის.
ახლა მთავარი გამოწვევა ისაა, რომ კერიკმა ევროპაში ნაჩვენები ხასიათი შიდა ჩემპიონატშიც გადაიტანოს და გუნდი კრიზისიდან გამოიყვანოს. პარალელურად, კლუბის მფლობელობის ირგვლივ ატეხილი აჟიოტაჟი არ წყდება და სპეკულაციები გრძელდება. ბექჰემის შესაძლო მოსვლა კი, გულშემატკივრებისთვის იმედის ნაპერწკალია, თუმცა რეალობაში ამ ყველაფერს უზარმაზარი ფინანსური დაბრკოლებების გადალახვა დასჭირდება.