Relevo: "2025 წლის მაისში ბენზემა კარიერას დაასრულებს და რეალში დაბრუნდება"

ცნობილი ესპანური მედიაგამოცემის "Relevo"-ს ინფორმაციით, ქარიმ ბენზემამ გადაწყვიტა, რომ კარიერა 2025 წლის მაისში დაასრულოს და იგი თავის ყოფილ კლუბში, მადრიდის "რეალში" ამბასადორად/ელჩად დაბრუნდება.

ესპანური მედიის ინფორმაციით, 36 წლის ფრანგმა კარიერის დასრულების გადაწყვეტილება უკვე მიიღო და "სამეფო კლუბის" მესვეურებსაც შეუთანხმდა, რომ 2025 წლის ზაფხულიდან "რეალში" მუშაობისთვის მზად იქნება.

"Relevo"-ს მიერ გავრცელებული ინფორმაციის თანახმად, კარიმ ბენზემა საუდის არაბეთში თამაშით დაიღალა და ოქროს ბურთის მოგების შემდეგ მისი საუდის არაბეთში წასვლის მიზანი, მხოლოდ და მხოლოდ კარგი ფინანსური ანაზღაურება იყო.

ბენზემა მადრიდის ,,რეალში'' 2009-2023 წლებში თამაშობდა. ფრანგმა თავდამსხმელმა ,,სამეფო კლუბის'' მაისურით ჩატარებულ 648 შეხვედრაში 354 გოლი გაიტანა და 165 საგოლე გადაცემა მიითვალა. საკუთარი მადრიდული კარიერა კი ოქროს ბურთის მოგებით დააგვირგვინა.