პირველად ფეხბურთის ისტორიაში - გამარჯვებულებს საჩემპიონო ბეჭდები გადაეცემათ

ნიუ ჯერსიში გასამართი არგენტინა-ესპანეთის ფინალური დაპირისპირების წინ, სადაც პლანეტის უმთავრესი საფეხბურთო ტიტულის ბედი უნდა გადაწყდეს, ცნობილი გახდა, რომ გამარჯვებულ გუნდს, სრულიად უნიკალური ჯილდო ელის. ფეხბურთის ისტორიაში პირველად, მსოფლიო ჩემპიონებს საჩემპიონო ბეჭდები გადაეცემათ.

ოქროსგან დამზადებული საჩემპიონო ბეჭდები ლურჯი ძვირფასი თვლებით იქნება მოპირკეთებული და მათზე ამოიტვიფრება წარწერა: „FIFA World Cup 2026 Champions“. ვიზუალური კონცეფცია ორგვარია: ბეჭდის ერთ მხარეს გამოსახული იქნება მსოფლიო ჩემპიონატის ლეგენდარული თასი, ხოლო მეორე მხარე დაეთმობა კონკრეტული გამარჯვებული ნაკრების ინდივიდუალურ ემბლემასა და სიმბოლიკას.

მთლიანობაში სულ 2026 ბეჭედი ჩამოისხმება. აქედან 30 ეგზემპლარი უშუალოდ გამარჯვებულ გუნდს გადაეცემა - თითოეული მათგანი პერსონალურად, ზუსტი ზომების მიხედვით დამზადდება ფეხბურთელებისა და სამწვრთნელო შტაბისთვის. დარჩენილი 1996 ბეჭედი კი თავისუფალ გაყიდვაში ჩაეშვება და ფართო საზოგადოებისთვის იქნება ხელმისაწვდომი. უშუალოდ საფინალო სასტვენის შემდეგ, დაჯილდოების ცერემონიაზე, მოთამაშეებს დროებით ასლებს გადასცემენ, რომლებსაც მოგვიანებით მათივე ზომაზე მორგებული ორიგინალებით ჩაუნაცვლებენ.

ეს პირველი შემთხვევაა მუნდიალების ისტორიაში, როდესაც გამარჯვებულს მსგავსი ფორმატის პრიზით დააჯილდოებენ. საჩემპიონო ბეჭდები ამერიკული სპორტული კულტურის განუყოფელი ატრიბუტია და ის ტრადიციულად გადაეცემათ ტიტულის მფლობელებს ყველა დონეზე: ბავშვთა ლიგებიდან დაწყებული, უმაღლესი პროფესიონალური ასოციაციებით დასრულებული.