ნეიმარი როდრიგოს ოქროს ბურთის ნომინანტებს მიღმა დარჩენას გამოეხმაურა

ბრაზილიის ეროვნული ნაკრებისა და მადრიდის ,,რეალის'' შემტევი, როდრიგო France Football-ის მიერ დასახელებულ ,,ოქროს ბურთის'' 30 ნომინანტს შორის ვერ მოხვდა.

23 წლის ფეხბურთელის ნომინანტებს მიღმა დარჩენას ნეიმარი გამოეხმაურა, რომელმაც სოციალურ ქსელში დაწერა, რომ როდრიგო ამ მომენტისთვის მსოფლიოს 5 საუკეთესო ფეხბურთელს შორისაა.

ფინალისტების დასახელების შემდეგ, ინსტაგრამის პირად გვერდზე პოსტი თავად ,,რეალის'' გარემარბმაც დადო. ბრაზილიელმა გასული სეზონის ფოტოკოლაჟი გამოაქვეყნა, რასაც თან სიცილისა და გაკვირვების ,,ემოჯები'' დაურთო.

2023-2024 წლების სეზონში როდრიგომ ,,სამეფო კლუბის'' მაისურით ჩატარებულ 51 მატჩში 17 გოლი გაიტანა და 9 საგოლე გადაცემა მიითვალა. შემტევმა ,,რეალთან'' ერთად ლა ლიგა, ესპანეთის სუპერთასი და ჩემპიონთა ლიგა მოიგო.