,,მცირე გამართლება და საქართველო 3:0-ს მოგვიგებდა'' - რას წერენ ალბანელები სოციალურ ქსელში

ერთა ლიგის B დივიზიონის პირველი ჯგუფის მე-2 ტურის შეხვედრაში საქართველოს ეროვნულმა ნაკრებმა ალბანეთს სტუმრად 1:0 მოუგო.

მატჩის შედეგის შესახებ ალბანეთის ფეხბურთის ფედერაციის გვერდზე გამოქვეყნებულ პოსტს ადგილობრივი გულშემატკივრების მხრიდან დიდი გამოხმაურება მოჰყვა:

• ,,საქართველოს ნაკრებმა სუპერ შეხვედრა ჩაატარა, ეს გუნდი ბევრისთვის დიდ სიურპრიზად რჩება. ჩვენ კი რამდენიმე მატჩი დაგვრჩა და მიზნისთვის ბრძოლა უნდა გავაგრძელოთ!''

• ,,უნდა ვაღიაროთ, სამწუხაროდ, ახლა საქართველო ჩვენზე ძლიერი ნაკრებია. მათ ეს ჩეხეთის წინააღმდეგ აჩვენეს და დღესაც დაამტკიცეს!''

• ,,ჩვენი თამაში იყო, მაგრამ არ გაგვიმართლა... წაგებას არ ვიმსახურებდით! თუმცა, ქართველ მეგობრებს ვულოცავ!''

• ,,არ დაგვავიწყდეს, რომ საქართველომ ჩეხეთი 4:1 გაანადგურა, ევროპის ჩემპიონატზე კი პორტუგალიას მოუგო.''

• ,,ძალიან სუსტად ვითამაშეთ, კარშიც კი ვერ დავარტყით. მწვრთნელმა თამაში ვერ წაიკითხა და ცვლილებები დააგვიანა.''

• ,,საქართველოსგან მაგალითი უნდა ავიღოთ, კარგი გაკვეთილი ჩაგვიტარეს.''

• ,,საქართველომ ჩვენი მწვრთნელის შეცდომების გამო გაიმარჯვა.''

• ,,ძალიან ძლიერი მეტოქე გვყავდა...''

• ,,მეკარე და თავდამსხმელი არ გვყავს, მცირე გამართლება და საქართველო 3:0-ს მოგვიგებდა.''

ერთა ლიგის 2 ტურის შემდეგ, საქართველო ჯგუფში 6 ქულით, ერთპიროვნულად ლიდერობს.

ვილი სანიოლის გუნდი მომავალ მატჩს 11 ოქტომბერს, უკრაინის წინააღმდეგ გამართავს.