მესის მატჩზე დასწრება 4 დოლარად? მსოფლიოს საკლუბო ჩემპიონატზე ბილეთების ფასი მკვეთრად შემცირდა

ფიფამ მაიამის კოლეჯის სტუდენტებს მსოფლიოს საკლუბო ჩემპიონატის გახსნითი მატჩის ბილეთებზე ფასდაკლებები შესთავაზა. ინფორმაციას The Athletic ავრცელებს.

პირველ ტურში ლეო მესის ინტერ მაიამი Hard Rock Stadium-ზე ეგვიპტურ ალ აჰლის შეხვდება. მატჩის ათიათასობით ბილეთი ჯერ კიდევ არ გაყიდულა, რის გამოც ფიფა იძულებული გახდა ფასები შეემცირებინა.

იმ შემთხვევაში თუ სტუდენტები ბილეთებს Miami Dade-ს კოლეჯის ელექტრონული ფოსტით შეიძენენ, მხოლოდ 20 დოლარს გადაიხდიან და დამატებით საჩუქრად 4 ბილეთს მიიღებენ, რაც იმას ნიშნვას, რომ ბილეთის საშუალო ღირებულება სულ რაღაც 4 დოლარი გამოვა.

The Athletic იმასაც წერს, რომ Ticketmaster-ზე ინტერ მაიამისა და ალ აჰლის მატჩის ბილეთის ფასი 55 დოლარამდე დაეცა, როცა წილისყრის შემდეგ მინიმალური ფასი 349 დოლარი იყო.

პირველი 32-გუნდიანი მსოფლიოს საკლუბო ჩემპიონატი 15 ივნისს დაიწყება და 13 ივლისს დასრულდება.

ფიფას გადაწყვეტილებით, 32 გუნდიდან ოკეანეთს - 1, აზიას, აფრიკასა და ჩრდ. ამერიკას 4-4, სამხრეთ ამერიკას - 6, ევროპას კი 12 წარმომადგენელი ეყოლება. 32-ე გუნდი კი მასპინძელი ქვეყნიდან იქნება (ინტერ მაიამი).

მსოფლიოს საკლუბო ჩემპიონატის ჯგუფები:

• A ჯგუფი - პალმეირასი, პორტუ, ალ აჰლი, ინტერ მაიამი

• B ჯგუფი - პსჟ, ატლეტიკო, ბოტაფოგო, სიეტლი

• C ჯგუფი - ბაიერნი, ოკლენდ სიტი, ბოკა ხუნიორსი, ბენფიკა

• D ჯგუფი - ფლამენგო, ესპერანსი, ჩელსი, ლოს ანჯელესი/ამერიკა

• E ჯგუფი - რივერ პლეიტი, ურავა რედ დაიმონდსი, ინტერი, მონტერეი

• F ჯგუფი - ფლუმინენსე, დორტმუნდი, ულსანი, მამელოდი სანდაუნსი

• G ჯგუფი - მანჩესტერ სიტი, ვიდადი, ალ აინი, იუვენტუსი

• H ჯგუფი - რეალი, ალ ჰილალი, პაჩუკა, ზალცბურგი