მანჩესტერს უდიდესი ტალანტი გაექცა - გაბრიელმა 'წითლები' რეალზე გაცვალა

რეალ მადრიდი მანჩესტერ იუნაიტედის 16 წლის ტალანტის, ჯეიჯეი გაბრიელის ტრანსფერს ასრულებს.

„სამეფო კლუბი“ მომავალი პროექტის ერთ-ერთი ყველაზე პერსპექტიული შენაძენის გასაფორმებლად ემზადება. ინგლისელი ახალგაზრდა თავდამსხმელი უკვე მადრიდში იმყოფება და გარიგების ოფიციალურად დასასრულებლად გადამწყვეტი დღეები იწყება. ფეხბურთელი მადრიდულ კლუბთან ერთად უკვე ვარჯიშობს და ბოლო დეტალების შეთანხმებას ელოდება.

მიუხედავად იმისა, რომ ტალანტით ბარსელონაც ინტერესდებოდა, კატალონიურმა კლუბმა ბრძოლაზე უარი თქვა. საბოლოოდ, გაბრიელმა კარიერის გაგრძელება რეალში გადაწყვიტა და მანჩესტერ იუნაიტედის დატოვება თავად მოითხოვა - იმ კლუბის, რომლის რიგებშიც არაერთი ასაკობრივი რეკორდი დაამყარა.

აღსანიშნავია, რომ ახალგაზრდა ფორვარდმა თავისი ნიჭით ევროპული ფეხბურთის ყურადღება უკვე დიდი ხანია მიიქცია. კომერციულ სფეროშიც კი, მან ჯერ კიდევ 14 წლის ასაკში ისეთი პირობებით გააფორმა კონტრაქტი „ნაიკთან“ (Nike), რომელიც გავრცელებული ინფორმაციით, ნეიმარის ანალოგიურ შეთანხმებას აღემატებოდა.

მანჩესტერულ გუნდში გადასვლისას ის კრიშტიანუ რონალდუს შვილთან ერთად წარადგინეს, რაც კლუბის მხრიდან მის მიმართ არსებულ უზარმაზარ მოლოდინებზე მიუთითებდა. ახლა კი, 16 წლის ასაკში, ჯეიჯეი გაბრიელი რეალის მაისურის მორგებთან ერთ ნაბიჯშია.