მაღალი პრესინგი და ბრძოლა ცენტრში - რაზეა დამოკიდებული პსჟ-სა და ბარსელონას შეხვედრის ბედი

„პარი სენ-ჟერმენისა“ და „ბარსელონას“ დაპირისპირება ტაქტიკური ფეხბურთის მხრივ მეტად საინტერესო იქნება. როგორც Mundo Deportivo-სთან საუბრისას ყოფილმა კატალონიელმა ფეხბურთელმა, ლობო კარასკომ აღნიშნა, მატჩის ბედი მხოლოდ ვარსკვლავების ინდივიდუალურ ოსტატობაზე არ იქნება დამოკიდებული. „პარკ დე პრენსზე“ გასამართ შეხვედრაში გადამწყვეტ როლს მაღალი პრესინგი, გუნდური ორგანიზება და მცირე დეტალები გადაწყვეტს.

ლუის ენრიკეს გეგმა მეტოქის შეცდომებზე თამაშსა და მაღალი პრესინგის გამოყენებას დაეფუძნება. ნაკლებად სავარაუდოა, რომ პარიზული გუნდი ბარსელონას ბურთს დაუთმობს, თუმცა ეს ტაქტიკა  გარკვეულ რისკებსაც შეიცავს. თუ პარიზელები პრესინგის დროს სათანადოდ ვერ იმოქმედებენ და დაცვაში თავისუფალ სივრცეებს დატოვებენ, ბარსელონას მათი გამოყენება და სწრაფი შეტევების ორგანიზება შეეძლება.

როგორც სავარაუდოა, გადამწყვეტი ბრძოლა ნახევარდაცვის ცენტრში იქნება. ვიტინიას, ფაბიან რუისის, როდრისა და პედრის დაპირისპირება მხოლოდ ბურთის ფლობას არ ეხება - ეს იქნება თამაშის ტემპისა და ბალანსის კონტროლისთვის გაჩაღებული ომი. 

უსმან დემბელეს, დეზირე დუესა და ხვიჩა კვარაცხელიას მთავარი ამოცანა მუდმივი გადაადგილებით მეტოქის მცველების პოზიციებიდან გამოყვანა და პრესინგის შედეგად გაჩენილი სივრცეების ათვისება იქნება. მათი მოძრაობა განსაკუთრებით მნიშვნელოვანი გახდება იმ შემთხვევაში, თუ „ბარსელონა“ ცენტრალურ ზონებს ჩაკეტავს.

ტაქტიკასთან ერთად, კარასკო უდიდეს მნიშვნელობას ფსიქოლოგიურ ფაქტორსაც ანიჭებს, რადგან შეხვედრის მიმდინარეობამ შესაძლოა ორივე გუნდის თავდაჯერებულობაზე იმოქმედოს. ესპანელის შეფასებით, ლუის ენრიკემ პარიზში ძლიერი და აგრესიული გუნდი შექმნა, ხოლო ეს დაპირისპირება, შესაძლოა, მიმდინარე სეზონის ჩემპიონთა ლიგის ფინალის ერთგვარ გენერალურ რეპეტიციადაც კი იქცეს.