ლუის ენრიკე: "ბოლო მატჩებში იღბალი დაგვაკლდა. სიტისთან კი ის ჩვენ მხარეს იყო."

პსჟ-ის მთავარმა მწვრთნელმა, ლუის ენრიკემ, აღიარა, რომ მანჩესტერ სიტისთან, მეორე ტაიმში, მისმა გუნდმა რთული მომენტები გადაიტანა. პარიზელებმა პირველი ტაიმი სამი უპასუხო გოლით მოიგეს. შეხვედრის მეორე ნახევარში კი, მანჩესტერელები ბევრად უფრო გააქტიურდნენ.

ენრიკემ ფეხბურთელები პირველ ტაიმში ნაჩვენები თამაშისთვის შეაქო, თუმცა არ დაუმალავს შეშფოთება იმის გამო, თუ როგორ შეიცვალა მატჩის მიმდინარეობა შესვენების შემდეგ. მწვრთნელმა ხაზგასმით აღნიშნა, რომ მიუხედავად დიდი უპირატესობისა, გამარჯვება გარანტირებული არ ყოფილა. ენრიკემ ისიც გაამხილა, რომ მატჩის მიმდინარეობისას, თავის თანაშემწეს, რაფელ პოლს ესაუბრა და აღნიშა, რომ ამჯერად, იღბალი პარიზელთა მხარეს იყო. მანამდე, საფრანგეთის ჩემპიონატში გამართულ შეხვედრებში, მის გუნდს იღბალი არ სწყალობდა.

პსჟ-ის მთავარმა მწვრთნელმა ასევე უარჰყო ის მოსაზრება, რომ მანჩესტერ სიტისთან გამარჯვებით, მისმა გუნდმა, ჩემპიონთა ლიგის დანარჩენ ფავორიტებსა და კონკურენტ გუნდებს, თითქოს რაიმე გზავნილი გაუგზავნა. ენრიკეს თქმით, მთავარი მიზანია, რომ გუნდი ტურნირის გადამწყვეტ ეტაპს საუკეთესო ფორმაში შეხვდეს.