კვარა Top 5-ში! იანვრის ყველაზე ძვირადღირებული ტრანსფერები

ხვიჩა კვარაცხელია მალე ,,პარი სენ ჟერმენთან'' 5-წლიან კონტრაქტს გააფორმებს. უკვე ცნობილია, რომ პარიზული კლუბი ქართველი ფეხბურთელის სანაცვლოდ 70 მილიონ ევროს გადაიხდის.

შედეგად, კვარას ტრანსფერი ზამთრის სატრანსფერო ფანჯრის პერიოდში ყველაზე ძვირადღირებულ გარიგებებს შორის მე-5 ადგილს დაიკავებს. ამ მხრივ პირველ ადგილს ფილიპე კოუტინიო იკავებს, რომლის სანაცვლოდაც ,,ბარსელონამ'' ,,ლივერპულს'' 135 მილიონი ევრო გადაუხადა.

საინტერესოა, რომ უშუალოდ სერია A-ში ხვიჩას ტრანსფერი ზამთრის ტრანსფერებს შორის მე-2 ყველაზე ძვირადღირებული იქნება. პირველ პოზიციაზე დუშან ვლაჰოვიჩია - სერბი ,,იუვენტუსმა'' ,,ფიორენტინადან'' 83.5 მილიონად იყიდა.

დღეს იტალიურ მედიაში დაიწერა, რომ კვარაცხელია ,,პსჟ-ში'' ხელფასის სახით 11 მილიონ ევროს მიიღებს. შედარებისთვის, ,,ნაპოლიში'' მისი ანაზღაურება 1.8 მილიონი ევრო იყო.

მიმდინარე სეზონში ხვიჩას ანგარიშზე ნეაპოლელთა მაისურით ჩატარებულ 19 შეხვედრაში 5 გოლი და 3 საგოლე გადაცემაა.