"ის მანჩესტერ სიტის მომავალი მწვრთნელია" - გვარდიოლა დე ძერბიზე

პრემიერ ლიგის გასულ სეზონში "მანჩესტერ სიტისა" და "ბრაიტონის ბოლო შეხვედრა 1:1 დასრულდა. აღნიშნული მატჩში მთავარი მწვრთნელების დაპირისპირება დიდ ინტერესს იწვევდა. მოლოდინმაც გაამართლა. შეხვედრის დასრულების შემდეგ, გვარდიოლა დე ძერბის ტაქტიკებით აღფრთოვანებული იყო.

The Telegraph-ის ცნობით, "ქალაქელების" თავკაცი იმდენად გაოცდა დე ძერბის ტაქტიკური სვლებით, რომ "თოლიების" წარმომადგენლებს უთხრა, რომ ის "სიტის" მომავალი მწვრთნელი უნდა გახდეს.

ტრებლის მფლობელი მწვრთნელი "'ბრაიტონის" თამაშის სტილის დიდი თაყვანისმცემელია. პეპ გვარდიოლას ისიც უთქვამს, რომ დე ძერბისგან გარკვეულ ტაქტიკურ სვლებსაც სწავლობს.

გვარდიოლას მოქმედი კონტრაქტი "სიტისთან" მომავალი სეზონის ბოლომდე აკავშირებს. მოსალოდნელია, რომ 52 წლის სპეციალისტი Etihad-ზე არ დარჩება და ახალ ხელშეკრულებას ხელს არ მოაწერს.