იკერ კასილასი: "ანჩელოტი ქამელეონს ჰგავს"

დღეს საკლუბო ფეხბურთის ერთ-ერთი ყველაზე მნიშვნელოვანი მატჩი გაიმართება. ესპანეთის ჩემპიონატის 32-ე ტურში "რეალ მადრიდი" სანტიაგო ბერნაბეუზე "ბარსელონას" მიიღებს. მოახლოებულ 'ელ კლასიკოს' ორივე გუნდი განსხვავებული ხასიათითა და ამბიციით ხვდება. იმის გარდა, რომ ესპანეთში რეალი თითქმის უკვე ჩემპიონია, ბრძოლას მეორე ფრონტზეც აგრძელებს და ჩემპიონთა ლიგის ნახევარფინალში "ბაიერნს" ელოდება. ბარსა სამეფო კლუბს 8 ქულით ჩამორჩება და ლიგაზეც "პსჟ"-გან მწარე ქამბექი მიიღო. რეალისა და მსოფლიო ფეხბურთის ლეგენდა, იკერ კასილასი, შექმნილი სიტუაციის მთავარ არქიტექტორად კარლო ანჩელოტის მიიჩნევს.

რეალისა და ბარსელონას დაპირისპირება, თბილისის დროით 23:00 საათზე დაიწყება. უკანასკნელი ელ კლასიკო, ესპანეთის სუპერ თასის ფინალში, რეალის გამარჯვებით 4:1 დასრულდა. ლა ლიგის პირველ წრეში, 'მონჟუიკზე' გამართული შეხვედრის მთელი პირველი ტაიმის განმავლობაში ბარსელონა დიდ უპირატესობას ფლობდა და მე-6 წუთზე, გუნდოგანის გოლითაც დაწინაურდა, თუმცა სამეფო კლუბმა იმ შეხვედრის დატრიალებაც შეძლო და ჯუდ ბელინგემის დუბლით გამარჯვება დაიტოვა (1:2).