გავრცელებული ინფორმაცია, თითქოს, ლუის ენრიკეს პსჟ-ს დატოვება სურს, ტყუილი აღმოჩნდა

დღეს სოციალურ ქსელში არაერთმა სპორტულმა გვერდმა დაწერა, რომ, თითქოს, პარი სენ ჟერმენის მთავარმა მწვრთნელმა, ლუის ენრიკემ ფრანგულ გუნდთან კონტრაქტის გახანგრძლივებაზე უარი თქვა.

ინფორმაცია Bild-ზე დაყრდნობით ვრცელდებოდა, თუმცა თავად გერმანულ გამოცემას ესპანელი სპეციალისტის შესახებ მსგავსი არაფერი დაუწერია. ტვიტერში ამ წუთამდე არაერთი პოსტი იძებნება, სადაც წყაროდ სწორედ Bild-ია მითითებული.

ლუის ენრიკეს დედაქალაქურ გუნდთან კონტრაქტი 2027 წლის ზაფხულამდე აკავშირებს. მისი ხელმძღვანელობით პარიზელებმა ლიგა 1 (2-ჯერ), საფრანგეთის თასი (2-ჯერ), სუპერთასი (2-ჯერ), ჩემპიონთა ლიგა, უეფას სუპერთასი და ფიფას საკონტინენტთაშორისო თასი მოიგეს.