დინასტია გრძელდება | კრიშტიანუ რონალდუ JR პორტუგალიის U17 ნაკრებში გამოიძახეს

პორტუგალიური ფეხბურთის ისტორიაში ახალი მნიშვნელოვანი ისტორია იწერება - 5-გზის „ოქროს ბურთის“ მფლობელის უფროსმა შვილმა, 16 წლის კრიშტიანუ რონალდუ უმცროსმა, მორიგი მნიშვნელოვანი ნაბიჯი გადადგა.

ალ-ნასრის აკადემიის ახალგაზრდა თავდამსხმელი მთავარმა მწვრთნელმა ფილიპე რამუშმა პორტუგალიის 17-წლამდელთა ნაკრების 23-კაციან განაცხადში შეიყვანა, რომელიც ნოემბერში ევროპის ჩემპიონატის შესარჩევი ეტაპის შეხვედრებს ჩაატარებს.

ფორვარდი, რომელიც საკლუბო დონეზე საუდის არაბეთში ასპარეზობს, ეროვნულ გუნდს თვის ბოლოს შეუერთდება. 'Zerozero'-ს ცნობით, მიმდინარე სეზონში მან ალ-ნასრის ასაკობრივ გუნდში ჩატარებულ 7 მატჩში 3 გოლის გატანა მოასწრო.

17-წლამდელთა ნაკრებში დაწინაურება ლოგიკური გაგრძელებაა იმ გზისა, რომელიც ახალგაზრდა ფეხბურთელმა 2025 წლის მაისში, U15 გუნდში დებიუტით დაიწყო. მას შემდეგ კრიშტიანუ უმცროსმა პორტუგალიის უმცროს ასაკობრივ ნაკრებებში 13 მატჩი ჩაატარა და 5 გოლი გაიტანა. 15-წლამდელთა შემადგენლობაში გამართულ 4 შეხვედრაში მან 2-ჯერ გამოიჩინა თავი, რის შემდეგაც მომდევნო ასაკობრივ ჯგუფში გადავიდა. მაღალი შედეგიანობა მან U16 ნაკრებშიც შეინარჩუნა, სადაც U17-ში გამოძახებამდე ჩატარებულ 9 მატჩში 3 გოლი ჩაიწერა აქტივში.

მამის სახელი და მიღწევები მოედანზე ყოველთვის დიდ ემოციურ წნეხს ქმნის, თუმცა 16 წლის თავდამსხმელისთვის უახლოესი საკვალიფიკაციო ეტაპი კიდევ ერთი შანსია, პორტუგალიის ნაკრების მაისურით საკუთარი სახელი დაიმკვიდროს. გულშემატკივრები, რომლებიც წლებია თვალს ადევნებენ უფროსი რონალდუს კარიერას, ახალგაზრდის პროგრესს საუდის არაბეთსა და სანაკრებო დონეზე განსაკუთრებული ყურადღებით აკვირდებიან. პარალელურად, ფეხბურთის სამყაროში არ წყდება მსჯელობა იმის შესახებ, მოასწრებენ თუ არა მამა-შვილი ოფიციალურ მატჩში ერთად მოედანზე გამოსვლას. ამ ფონზე, პორტუგალიის ეროვნული ნაკრები მომდევნო პარასკევს ახალ განაცხადს გამოაქვეყნებს, სადაც ალ-ნასრის კაპიტნის გვარიც იქნება.

კრიშტიანუ უმცროსის მთავარი ამოცანა U17 ნაკრებთან ერთად 4-გუნდიან ჯგუფში საუკეთესო ორეულში მოხვედრა და მომდევნო ეტაპზე გასვლაა. ჯგუფური ეტაპის სამივე შეხვედრა პორტუგალიის ფეხბურთის ფედერაციის ბაზაზე (Cidade do Futebol), ოეირასში გაიმართება. ფილიპე რამუშის გუნდი ტურნირს 11 ნოემბერს ანდორასთან მატჩით დაიწყებს, 14 ნოემბერს ბულგარეთს დაუპირისპირდება, ხოლო სამი დღის შემდეგ სანაკრებო პაუზას სერბეთთან შეხვედრით დაასრულებს.