ატალანტამ ლოგო შეცვალა და სავარაუდოდ, მწვრთნელსაც შეიცვლის

იტალიელი ჟურნალისტის, ნიკოლო სკირას ცნობით, ლაციოს მთავარი მწვრთნელი, მაურიციო სარი სეზონის ბოლოს კლუბს დატოვებს და ატალანტაში გადავა სამუშაოდ.

67 წლის ტაქტიკოსის ბერგამოელებთან მოლაპარაკებები დასკვნით ეტაპზეა - კონტრაქტი 2029 წლამდე იქნება გათვლილი, წელიწადში 3.5 მილიონი ევროს ანაზღაურებით.

როგორც ამბობენ, სარი თავიდან თავისი ყოფილი კლუბის, ნაპოლის ხელმძღვანელობას დათანხმდა, მაგრამ ახლა მან „ლა დეა“ აირჩია, რადგან მათი პროექტითა და შეთავაზებით დაინტერესდა. ჩელსის ყოფილი მწვრთნელი რაფაელ პალადინოს შეცვლის, რომელიც, შესაძლოა, ლაციოში გადავიდეს (პირდაპირი გაცვლა გამოვა).

ამ ამბის გარდა, ატალანტაში კიდევ ერთი დიდი სიახლეა - კლუბმა ლოგო შეცვალა (განაახლა). La Dea-ს სილუეტი (ქალღმერთი/მონადირე ქალი და სწრაფი მორბენალი) პირველად ატალანტას კლუბის გერბზე 1960-იან წლებში გამოჩნდა. მას შემდეგ ის კლუბის განმსაზღვრელ სიმბოლოდ რჩება და დროთა განმავლობაში სხვადასხვა საჭიროებებთან ადაპტირდა - ნაქარგებიდან და ბეჭდვიდან დაწყებული, ციფრული აპლიკაციებით დასრულებული, რამაც დღეს წარმოდგენილ რედიზაინამდე მიგვიყვანა.

ახალი გერბი შთაგონებულია 1980-იან წლებში შემოღებული წრიული ფორმიდან, რომელიც ზუსტი გეომეტრიული კონსტრუქციის მეშვეობით არის გადააზრებული. მისი წამყვანი პრინციპია ამოღება: არასაჭირო ელემენტების მოშორება, რათა La Dea უფრო თვალსაჩინო გახდეს. თმა ხუთ ღერად გადაკეთდა, რაც პატივს მიაგებს ხუთ დამფუძნებელს, რომლებმაც 1907 წელს კლუბს სიცოცხლე შესძინეს. ფონი მთლიანად ლურჯია - შავი წრით შემოსაზღვრული.