ანტონიო კონტემ კვარაცხელიას ნაადრევად შეცვლის მიზეზი დაასახელა

იტალიის სერია A-ს მე-13 ტურში "ნაპოლიმ" საკუთარ მოედანზე "რომას" უმასპინძლა და ლუკაკუს ერთადერთი გოლით დაამარცხა (1:0). 54-ე წუთზე ხვიჩა კვარაცხელიას მიერ წამოწყებული შეტევა დი ლორენცომ გააგრძელა და კაპიტანმა ბელგიელ ფორვარდს გაატანინა. ანტონიო კონტემ კვარაცხელია 67-ე წუთზე შეცვალა, ქართველს უკმაყოფილება აშკარად ეტყობოდა, თუმცა მწვრთნელმა მატჩის შემდეგ დეტალურად ახსნა საკუთარი გადაწყვეტილება.

ზედიზედ ორი მოუგებელი შეხვედრის შემდეგ, ნაპოლიმ 3 ქულა მოიპოვა და ცხრილის პირველ ადგილს 29 ქულით იკავებს. მომდევნო 4 გუნდს 28 ქულა აქვს და ჩემპიონობისთვის ბრძოლაში, გუნდებს შორის დიდი სიმჭიდროვეა. კონტეს გუნდი მომავალ შეხვედრას 1-ელ დეკემბერს, "ტორინოს" წინააღმდეგ გამართავს.