აღფრთოვანება ლივერპულში და გლოვა ვალენსიაში - ფანები მამარდაშვილის ტრანსფერს გამოეხმაურნენ

"ლივერპულმა" და "ვალენსიამ" გიორგი მამარდაშვილის ტრანსფერი ოფიციალურად დაადასტურეს. ქართველი კიპერი მიმდინარე სეზონის ბოლომდე ესპანურ კლუბში ითამაშებს, 2025 წლის ივლისში კი პრემიერ ლიგის გრანდს შეუერთდება.

• ოფიციალურად | გიორგი მამარდაშვილი ლივერპულის ფეხბურთელია

მძიმე ფინანსურ მდგომარეობაში მყოფმა "ვალენსიამ" მამარდაშვილის სანაცვლოდ სოლიდური თანხა მიიღო და იმ შემთხვევაში, თუ მომავალში "ლივერპული" მამარდაშვილს გაყიდის, ესპანელები სატრანსფერო ღირებულების 10%-ს დამატებით მიიღებენ.

გიორგი მამარდაშვილის ტრანსფერს "ლივერპულისა" და "ვალენსიას" გულშემატკივრები განსხვავებულად შეხვდნენ. ესპანელები საუკეთესო კიპერის დაკარგვას გლოვობენ და კლუბის მენეჯმენტს აკრიტიკებენ - მერსისაიდელები კი ტრანსფერით აღფრთოვანებას ვერ მალავენ.

• საბრალონი ხართ. თქვენ ხართ საფეხბურთო კლუბის ყველაზე ცუდი მენეჯერები სპორტის ამ სახეობის ისტორიაში. თქვენი მოტივაციის წყარო არც ფულია და არც ღირსება - თქვენ სიძულვილი გმართავთ. ბევრი რამის თქმა შეიძლება, მაგრამ უბრალოდ საშინელი ადამიანები ხართ. მოშორდით ჩვენს კლუბს.

• კარგი იქნებოდა გცოდნოდათ იმ დიდებული წარსულის შესახებ, რომელიც ჩვენს კლუბს ჰქონდა - ჩემპიონი "ვალენსია", რომელიც ერთ დროს ევროპის საუკეთესოთა შორის იყო. გიორგი მამარდაშვილო, მადლობა იმისთვის, რაც ჩვენთვის და კლუბისთვის გააკეთე. სიცოცხლის ბოლომდე მადლიერი ვიქნები.

• ვნახოთ, როდის მიაღწევთ შეთანხმებას კლუბის გაყიდვასთან დაკავშირებით.

• გიორგი კეთილი იყოს შენი მობრძანება კლუბში, რომელსაც გააჩნია სული და ღირსება. მოუთმენლად გელით YNWA.

• ტოპ ტრანსფერია - მეკარის პოზიციაზე სანერვიულო ნამდვილად არ გვექნება.

• კეთილი იყოს შენი მობრძანება. აქ დიდებული გარემო და თანაგუნდელები დაგხვდებიან.

შეგახსენებთ, კლუბებს შორის შემდგარი გარიგების თანახმად, გიორგი მამარდაშვილი მიმდინარე სეზონის ბოლომდე "ვალენსიაში" ითამაშებს, 2025 წლის ივლისში კი "ლივერპულს" შეუერთდება.