გიორგი ქინქლაძე: "კვარა კვარაა, მის აღსაწერად სიტყვები არ კმარა"

ქართული ფეხბურთის ლეგენდამ, გიორგი ქინქლაძემ, FourFourTwo-სთან ინტერვიუში ნაკრების ლიდერზე, ხვიჩა კვარაცხელიაზე ისაუბრა და გუნდში მისი როლი შეაფასა. დღეს ქართველები, ისტორიულ შეხვედრაში, თურქეთის ნაკრებს დაუპირისპირდებიან. გიორგი ქინქლაძეს საქართველოს ნაკრების შემადგენლობაში 58-ჯერ უთამაშია, თუმცა მისი ოცნება - დიდ სანაკრებო ფორუმზე მიეღო მონაწილეობა, მხოლოდ ახლა აუხდა ქვეყანას - ხვიჩა კვარაცხელიას ლიდერობით.

ნაპოლის გარემარბმა ოთხი გოლი გაიტანა საკვალიფიკაციო ეტაპზე და საერთო ჯამში 15 გოლი დაუგროვდა - ეს ყველა დროის მესამე საუკეთესო შედეგია შოთა არველაძის (26) და თემური ქეცბაიას (17) შემდეგ.

თურქეთთან შეხვედრა თბილისის დროით 20:00 საათზე დაიწყება. საქართველოს ნაკრების მნიშვნელოვანი დანაკლისი ოთარ კიტეიშვილია, რომელმაც დაზიანება მონტენეგროსთან ამხანაგურ შეხვედრაში მიიღო. სხვა მხრივ, გუნდის 25 ფეხბურთელი ზიგნალ იდუნა პარკზე სათამაშოდ მზადაა.