საქართველოს ნაკრები პრინციპულ დაპირისპირებაში დამარცხდა

პორტუგალიის ქალაქ ოეირასში მიმდინარე “ბილი ჯინ კინგ თასის” ტურნირზე, საქართველოს ქალ ჩოგბურთელთა ნაკრები პრინციპულ დაპირისპირებაში დამარცხდა და ჯგუფში პირველი ადგილის დაკავების შანსი დაკარგა.

ირლანდიის (2:1), სამხრეთ აფრიკის (3:0), ლიეტუვასა (2:1) და კოსოვოს (3:0) ბარიერის გადალახვის შემდეგ, საქართველოს ნაკრები ესტონეთთან დამარცხდა (0:3).

• საქართველოს ნაკრების პირველი გამარჯვება ბილი ჯინ კინგის თასზე
• საქართველოს ნაკრებმა ბილი ჯინ კინგის თასზე მეორე გამარჯვება მოიპოვა
• საქართველოს ნაკრებმა ბილი ჯინ კინგის თასზე მესამე გამარჯვება მოიპოვა
• საქართველოს ნაკრებმა ბილი ჯინ კინგის თასზე კოსოვო დაამარცხა

ესტონეთი საქართველოს ქალ ჩოგბურთელთა ნაკრების პრინციპული მეტოქე გახლდათ. ქვეჯგუფის ყველაზე ძლიერ მონაწილეებად საქართველო და ესტონეთი მიიჩნეოდნენ და პირველი ადგილისათვის დიდი ბრძოლა გაიმართა.

ერთეულთა თანრიგის პირველ შეხვედრაში, მაილენ ნუუდისა და სოფია შაფათავას დაპირისპირება შედგა, რომელშიც ესტონელმა ჩოგბურთელმა 2-სეტში (7:6 (7:5), 6:3) გაიმარჯვა.

მეორე მატჩში ეკატერინა მალიგინასა და ეკო გორგოძის დაპირისპირება გაიმართა. პირველი სეტი ესტონელი ჩოგბურთელის გამარჯვებით (6:3) დასრულდა. მეორე სეტში გორგოძემ თამაშის გაგრძელება ვერ შეძლო და დაპირისპირებას ჩაეხსნა.

წყვილთა თანრიგში ლაურა რანელისა და მაილენ ნუუდის დუეტი ნათელა ძალამიძისა და ნინო ნაცვლიშვილის წყვილს დაუპირისპირდა. მატჩი 2-სეტში (7:5, 6:0) საქართველოს ნაკრების მარცხით დასრულდა, თუმცა აღნიშნული დაპირისპირების შედეგს ისედაც სიმბოლური დატვირთვა ჰქონდა.

დასკვნით შეხვედრაში განცდილი მარცხის შედეგად, საქართველო მეორე ადგილს დასჯერდა, B-ჯგუფის საუკეთესო წარმომადგენელი კი ესტონეთი გახდა, რაც იმას ნიშნავს, რომ ეს ნაკრებები პლეი-ოფში ჯვარედინი პრინციპით A-ჯგუფის პირველ-მეორე ადგილოსნებს დაუპირისპირდებიან. საქართველოს მეტოქე მოგვიანებით გახდება ცნობილი. შეგახსენებთ, რომ ტურნირის 2 საუკეთესო ნაკრები I ჯგუფში გადასასვლელ პლეი-ოფში თამაშის შესაძლებლობას მიიღებს.