მორიგი ქართველი ტულონში - გიორგი ჯავახია სეზონის ბოლომდე TOP 14-ის გრანდში ითამაშებს

ცნობილი ფრანგული სარაგბო გამოცემა 'Rugbyrama'-ს გავრცელებული ინფორმაციის თანახმად, საქართველოს ეროვნული ნაკრების 29 წლის მეორეხაზელი - გიორგი ჯავახია, კარიერას TOP 14-ის გრან ტულონში გააგრძელებს.

ფრანგულ წყაროზე დაყრდნობით, გიორგი ჯავახიასა და ტულონს შორის მოლაპარაკება გუშინ ოფიციალურად დასრულდა, რის შემდეგაც ქართველი მორაგბე ტულონს 'სამედიცინო ჯოკრის' სტატუსით დაემატაბა, რაც ტულონის მეორეხაზელების ტრავმებით არის გამოწვეული და ჯავახია მათ ჩაანაცვლებს - ასევე აღსანიშნავია ის ფაქტი, რომ იგი კლუბთან ისეთ კონტრაქტს გააფორმებს, რომელიც 'სამედიცინო ჯოკრის' დროის ამოწურვის შემდეგ, თუ კლუბს მისი თამაში მოეწონება, მის დატოვებას გაითვალისწინებს.

გიორგი ჯავახიას კლუბში ქართველი თანაგუნდელი - ბექა გიგაშვილი დახვდება, ასევე წლების განმავლობაში ამ კლუბში: გია ლაბაძეს, მამუკა გორგოძეს, ბადრი ალხაზაშვილს და ლუკა ჭელიძეს უთამაშიათ.

გიორგი ჯავახია საქართველოს ნაკრების წევრია, მას ეროვნული ნაკრების ფორმა 21-ჯერ აქვს მორგებული და წლების განმავლობაში PRO D2-ის კლუბებში: ლიონში, ორიაკსა და გრენობლში თამაშობდა.