დიდი თამაშის კვირა დაიწყო

სულ რაღაც 5 დღე დარჩა ქართული რაგბისთვის მორიგ ისტორიულ თარიღამდე. საქართველოს, 150-წლიანი ისტორიის მქონე ინგლისური გრანდი ‘გლოსტერი’ ეწვევა და 9 დეკემბერს, ჩვენი დროით 17 საათზე, „მიხეილ მესხზე“ ‘შავი ლომის’ წინაშე წარსდგება. დიდი თამაშის კვირა დაიწყო!

ევროპის პროფესიული საკლუბო რაგბმა (EPCR) ქართული რაგბისთვის უმნიშვნელოვანესი გადაწყვეტილება ზაფხულში მიიღო, რაც სანაკრებო ფრენჩაიზ ‘შავ ლომს’ მინიმუმ ოთხი უმაღლესი, ტიერ1 დონის შეხვედრის გამართვის შესაძლებლობას მისცემს.

9 დეკემბერს ‘გლოსთერის’ მასპინძლობის შემდეგ, ჩვენი გუნდი უელსში გაემგზავრება, სადაც 17 დეკემბერს ‘სკარლეტს’ შეხვდება; 13 იანვარს საფრანგეთში ‘კასტრს’ ესტუმრება, ხოლო 20-ში „მიხეილ მესხზე“ ‘კლერმონს“ დაუხვდება.

‘შავი ლომის’ პირველი მეტოქე ‘გლოსტერი’ ჩელენჯ თასის ორგზის გამარჯვებულია (2006, 2015), ორჯერ კი ფინალში დამარცხდა (2017, 2018). მან ინგლისის პრემიერშიფში 4-ჯერ დაიკავა მეორე ადგილი. ‘გლოსტერში’, 2,5-სეზონი გაატარა ბორჯღალოსანმა გიორგი კვესელაძემ, რომელიც ზაფხულში საქართველოში დაბრუნდა, ‘შავ ლომს’ შეუერთდა და შაბათს ყოფილი გუნდის წინააღმდეგ ითამაშებს.

უელსური ფრენჩაიზი ‘სკარლეტსი’ 2003 წელს შეიქმნა და ორჯერ, 2004 და 2017 წლებში იყო კელტების ლიგის და პრო 14-ის (ამჟამად დამოუკიდებელი რაგბის ჩემპიონატი) ჩემპიონი.

117 წლის ‘კასტრი’ 5-ჯერ გახდა საფრანგეთის ჩემპიონი (1949, 1950, 1993, 2013, 2018), სამჯერ მეორე ადგილს დასჯერდა (1995, 2014, 2022), ჩელენჯ თასის ფინალში კი ორჯერ დამარცხა (1997, 2000).

‘კლერმონი’ 112 წლის წინ დაარსდა და ‘შავი ლომის’ მეტოქეებიდან ყველაზე ტიტულოვანია. ის 3-ჯერ ფლობდა ჩელენჯ თასს (1999, 2007, 2019), ორჯერ კი ტოპ 14-ის ჩემპიონი გახდა (2010, 2017). „ვულკანებს“ ყველაზე მეტი ფინალი აქვთ წაგებული – 12 საფრანგეთის ჩემპიონატში, 3 ჩემპიონთა თასზე და ერთიც ჩელენჯ თასზე.

2021 წელს დაარსებულმა ‘შავმა ლომმა’, რომელიც ევროპის სუპერ თასის ორგზის მფლობელია და ფინალში ზედიზედ მესამედ ითამაშებს, ‘გლოსტერთან’ მატჩისთვის მზადება უკვე დაიწყო.

Investec ჩემპიონთა თასი და ჩელენჯ თასი

1995 წელს, რაგბის პროფესიულ რელსებზე გადასვლის შემდეგ, დღის წესრიგში ევროპის საერთაშორისო საკლუბო ტურნირების გამართვის საკითხი დადგა. შეიქმნა შპს ევროპის სარაგბო თასი, რომელსაც მაშინდელი ხუთი ერის კომიტეტი მართავდა და 1995/96 წლებში ჰეინეკენის თასის პირველი ტურნირი გაიმართა, მომდევნო სეზონში კი მას ჩელენჯ თასიც დაემატა.

2012 წელს ინგლისურმა და ფრანგულმა კლუბებმა ევროპის სარაგბო თასის ორგანიზატორებს აცნობეს, რომ მისი შემადგენლობიდან გადიოდნენ. სიტუაციის დასარეგულირებლად 2014 წელს ჩამოყალიბდა ევროპის პროფესიული კლუბების რაგბი, რომელმაც ჰეინეკენის ჩემპიონთა თასისა და ჩელენჯ თასის გამართვა საკუთარ თავზე აიღო. ორგანიზაციამ ბინა შვეიცარიაში, ლოზანაში დაიდო.

თავდაპირველად ტურნირებში მხოლოდ ევროპის წამყვანი სარაგბო ქვეყნების კლუბები მონაწილეობდნენ, გასული სეზონიდან კი მასში სამხრეთ აფრიკული ფრენჩაიზებიც ჩაერთვნენ.

2023/2024 წლების Investec ჩემპიონთა თასისა და ჩელენჯ თასის გათამაშებები 8 დეკემბერს იწყება. ჯგუფურ ეტაპზე თითოეული გუნდი 4 თამაშს გამართავს – ორს შინ და ორსაც სტუმრად, რის შემდეგაც ოთხსაფეხურიანი პლეი ოფები დაიწყება. ფინალური შეხვედრები (ორივე ტურნირის) 2024 წლის მაისში, ლონდონში, „ტოტენჰემ ჰოთსფურის“ სტადიონზე გაიმართება.

ჩემპიონთა თასზე 24 გუნდი მონაწილეობს, რომლებიც ოთხ 6-გუნდიან ჯგუფში არიან გადანაწილებული. თითოეული ჯგუფის მოწინავე ოთხეული პლეი ოფში გადის, მეხუთეადგილოსნები კი ჩელენჯ თასზე გადაინაცვლებენ.

ჩელენჯ თასზე 18 გუნდი სამ 6-გუნდიან ჯგუფშია განაწილებული და 4-4 საუკეთესო თასისთვის აგრძელებს ბრძოლას. ჩელენჯ თასის გამარჯვებული მომავალ სეზონში ჰეინეკენის ჩემპიონთა თასის საგზურს მიიღებს. ‘შავი ლომისთვის’ ეს ერთადერთი შესაძლებლობაა ჩემპიონთა თასზე მოსახვედრად.

ტურნირების არსებობის განმავლობაში ჩემპიონთა თასი ყველაზე ბევრჯერ ფრანგულმა კლუბებმა მოიგეს (11), მეორე ადგილზე ინგლისური გუნდები არიან (10), მესამეზე კი ირლანდიური (7). თასი 5-ჯერ მოიგო ფრანგულმა ‘ტულუზმა’, 4-ჯერ ირლანდიურმა ‘ლენსთერმა’, 3-3-ჯერ კი ‘სარასენსმა’ (ინგლისი) და ‘ტულონმა’ (საფრანგეთი).

წყარო: rugby.ge