7-კაცა | შემადგენლობა ლისაბონის ეტაპზე
2 წლის წინ
რაგბი
6 წთ
რაგბის კავშირის სპორტული მიმართულების ვიცე-პრეზიდენტი ბაჩო ხურციძე ამბობს: "ჯაბა ძალიან კარგად უძღვება 7-ქალა ნაკრებს და სწორედ მისი ხელმძღვანელობით გუნდი კონფერენც დივიზიონიდან ალაფაზე აღზევდა. ახლა მას 7-კაცას ნაკრები ჩავაბარეთ, რაც მისთვის არის ერთგვარი შესაძლებლობა. მიუხედავად იმისა, რომ მას გუნდის მოსამზადებლად მცირე დრო ჰქონდა, ჯაბას შესაძლებლობებში ეჭვი არ გვეპარება და გვწამს, რომ ნაკრები ღირსეულ თამაშებს აჩვენებს. რადგან დიდ 10-ში ფლეი ოფებია, მას მოთამაშეთა შერჩევის კუთხითაც მწირი შესაძლებლობა ქონდა. 7-კაცა ჩვენთვის გრძელვადიანი პროექტია, ოლიმპიური თამაშების სახეობაა და გვინდა აქაც მივაღწიოთ საგრძნობ წარმატებას". კოვიდ-პანდემიისა თუ სხვა მიზეზებიდან გამომდინარე, მწვრთნელებს მოთამაშეთა შერჩევისას პრობლემები შეექმნათ. გარდა ეროვნულ და 20-წლამდელთა ნაკრებებში გამოძახებული მორაგბეებისა, მათ ვერ გამოიძახეს დიდი 10-ის ნახევარფინალში გასული გუნდების მოთამაშეები, პანდემიამ და კოვიდ-ვირუსმა კი, მწირი არჩევანი კიდევ უფრო შეამცირა და ამავე მიზეზით ამხანაგური თამაშის გამართვაც ვერ მოხერხდა. შემადგენლობასა და არსებულ პრობლემებთან დაკავშირებით ჯაბა მალაღურაძემ განაცხადა: "ურთულეს პირობებში ვართ. ერთის მხრივ, ვირუსის გამო სრულფასოვანი ვარჯიშების ჩატარების შესაძლებლობა არ მოგვეცა და მეორეს მხრივ, იმავე პანდემიამ თუ სხვა მიზეზებმა შიდა ჩემპიონატის დასრულება გადადო და მოთამაშეთა ნაწილი დაკავებულია. იმ ბირთვთან ერთად, რომელიც დაგვრჩა, მე და გიორგიმ დავგეგმეთ შეკრება, ვარჯიშები და შევუდექით მოთამაშეებისთვის ძირითადი პრინციპების გაცნობას".
"რაგბი კოლექტიური თამაშია და 7-კაცაშიც მხოლოდ შემსრულებელთა ინდივიდუალურ უნარებს ვერ დავეყრდნობით. აუცილებელია შეტევისა და დაცვის სისტემების გაცნობა. კარგად გვესმის, რომ დრო ცოტაა და არ გვაქვს იმის ილუზია, რომ ყველაფერი შესრულდება. კოვიდ-რეგულაციების გამო, შეკრების შეწყვეტა მოგვიწია და მოთამაშეთა ნაწილი მოგვიანებით შემოგვიერთდა. გარდა ამისა, ვერ ჩავატარეთ მოსამზადებელი თამაშები, რაც სელექციაში დაგვეხმარებოდა. გვქონდა ლიეტუვას ნაკრებთან შეხვედრის შანსი, რომელიც პრივატულად დაგვიკავშირდა და საკუთარი ინიციატივით ჩამოვიდა თბილისში, მაგრამ ვირუსის დაფიქსირების გამო, მოგვიწია რეგულაციებზე დამორჩილება და ეს თამაშები, ასევე ერთობლივი ვარჯიში ვეღარ შედგა". "ვირუსის დაფიქსირების გამო, შემადგენლობაში გარკვეული ცვლილებების განხორციელება მოგვიწია და სელექცია ფაქტობრივად ინტუიციის ხარჯზე მოხდა. დაგვემატა გიორგი შკინინი, რომელსაც უდიდესი საერთაშორისო გამოცდილება აქვს და ვთვლით, რომ მისი ეს გამოცდილება გუნდს ძალიან წაადგება". "ყველანი კარგად ვაცნობიერებთ, რომ ვართ მორაგბეები, მოედანზე მხოლოდ მოსაგებად უნდა გახვიდე და მიიღო სიამოვნება. ასეთ ფონზე პროგნოზებს ვერ გავაკეთებთ, თუმცა დანამდვილებით შეგვიძლია ვთქვათ, რომ ყველა შეხვედრაში მაქსიმუმს გავიღებთ და რა შედეგისთვის აღმოჩნდება ეს საკმარისი, ლისაბონში გამოჩნდება". 7-კაცა რაგბში ჩემპიონატის მეორე ეტაპი 26-27 ივნისს რუსეთში გაიმართება და იქ ჯგუფები პირველ, ლისაბონის ეტაპზე ნაჩვენები შედეგების მიხედვით შედგება.