18-წლამდელთა მორაგბეთა ნაკრები 6 ერის ფესტივალზე ითამაშებს!

უმცროსი ბორჯღალოსნები, მარტის ბოლოს, იტალიის ქალაქ პარმაში გაემგზავრებიან და 8-გუნდიან 18-წლამდელთა ექვსი ერის ფესტივალში მიიღებენ მონაწილეობას. 6 ერის ძირითად ნაკრებებს საქართველო და პორტუგალია ემატება. ფესტივალი 30 მარტს საქართველოსა და შოტლანდიის მატჩით იხსნება, 3 აპრილს საფრანგეთს ვეთამაშებით, 7 აპრილს კი - ინგლისს.

უმცროსმა ბორჯღალოსნებმა 2018 წლიდან ზედიზედ ხუთჯერ მოიპოვეს 18-წლამდელთა ევროპის ჩემპიონის ტიტული, სწორედ ამიტომ მსოფლიო რაგბისა და ექვსი ერის ეს გადაწყვეტილება იმ პროგრესის გამოხმაურებაა, რომელსაც ქართული რაგბი ბოლო წლებში განიცდის, მათ შორის ახალგაზრდული ნაკრებების დონეზე.

2012-2015 წლებში საქართველო 18-წლამდელთა ევროპის ჩემპიონატებში ექვსი ერის გუნდებთან ერთად თამაშობდა და 2015 წელს ფინალშიც გავიდა, თუმცა მას შემდეგ ტურნირი საფრანგეთის გარდა ყველა მონაწილემ დატოვა. 2018 წლის ევროპის ჩემპიონატის ფინალში საფრანგეთის დამარცხების შემდეგ, ევროპის ჩემპიონატიდან ისიც გავიდა, ახლა კი საქართველო ელიტას უბრუნდება.

ჩვენი გუნდი 18-წლამდელთა ექვსი ერის ფესტივალისთვის მზადებას 19 თებერვალს ქუთაისში იწყებს, პარმაში გამგზავრებამდე კი ლიონში ჩავა და "ლიონის" 18-წლამდელთა გუნდთან 26 მარტს გასახურებელ თამაშს გამართავს.