"ყველაზე ნათელი მომავალი, ვიდრე ოდესმე: საქართველოს ოქროს ხანა აქვს" - ევროპული მედია ქართული ფეხბურთის წინსვლაზე
ევროპული მედია ქართული ფეხბურთის უახლოესი წლების წინსვლასა და ნათელ მომავალზე აქტიურად საუბრობს. ამჯერად, სანაკრებო წარმატებისა და ქართველი ლეგიონერების ევროპის ტოპ ლიგებსა და გუნდებში წარმატებულ თამაშზე სლოვენიური nogomania წერს. მათ სტატიაში, რომელიც ქართული ფეხბურთის წინსვლას ეძღვნება და ასეთი სათაური აქვს: "საქართველოს ოქროს ხანა", ნათქვამია, რომ ჩვენი ქვეყნის საფეხბურთო ცხოვრებაში ყველაზე ნათელი მომავალი მოსჩანს.
"ახლა საქართველოს ნაკრები ისტორიულ პერიოდს გადის. საქართველოს ფეხბურთის ოქროს თაობა აღმავლობას განაგრძობს და ამის მორიგი დასტური გიორგი ქოჩორაშვილის ლისაბონის "სპორტინგში" ტრანსფერია. საქართველოს ნაკრები ნიჭიერი ფეხბურთელების ტალღას აწარმოებს, რომლებიც ევროპის ტოპ ლიგებში ყვავიან.
უახლესი ნაბიჯი 25 წლის გიორგი ქოჩორაშვილის "ლევანტედან" ლისაბონის "სპორტინგში" ტრანსფერია, რომელიც პორტუგალიურ გრანდს 5 მილიონი ევრო უღირს.
ეს ტრანსფერი კიდევ ერთი ეტაპია საქართველოს ნაკრებისთვის, რომელმაც ისტორიაში სადებიუტოდ ევროპის ჩემპიონატზე ითამაშა და მერვედფინალში გავიდა, სადაც მომავალ ჩემპიონ ესპანეთის ნაკრებთან წააგო.
ქართული ფეხბურთის ამჟამინდელ ვარსკვლავებს შორის "პსჟ-ს" ხვიჩა კვარაცხელია და მეკარე, გიორგი მამარდაშვილი არიან, რომელიც შემდეგი სეზონიდან "ლივერპულში" ითამაშებს. ელიტარული ნიჭის მქონე ვარსკვლავები კიდევ ბევრნი არიან: გიორგი მიქაუტაძე, რომელიც "ლიონში" თამაშობს, ზურიკო დავითაშვილი "სენტ-ეტიენში" მძლავრ სეზონს ატარებს, ხოლო საბა გოგლიჩიძე "ემპოლის" მთავარი პერსპექტივაა.
სწრაფად გაუმჯობესებული შემადგენლობით და კიდევ უფრო მეტი ფეხბურთელით, რომელიც საერთაშორისო დონეზე ბრწყინავს, საქართველოს პროექტი შეჩერებას არ აპირებს. გიორგი ქოჩორაშვილის "სპორტინგში" ტრანსფერი უახლოესი გამოძახილია იმის, რომ საქართველოს ჯერ არასდროს რომ არ ჰქონია, ისეთი ნათელი საფეხბურთო მომავალი აქვს", - წერს nogomania.
გიორგი ქოჩორაშვილის საფეხბურთო კარიერა "დინამო თბილისის" აკადემიაში იწყება, რასაც "იბერია 1999-ს", იმ დროს "საბურთალოს" აკადემიაში გადასვლა მოჰყვა. 2017 წელს, გიორგი ქოჩორაშვილმა იჯარით "ჟირონასა" და "პერალადას" ახალგაზრდულ გუნდებში ითამაშა. 2019 წელს, გიორგი ქოჩორაშვილი "ლევანტემ" დაიმატა, ჯერ სარეზერვო და ახალგაზრდულ გუნდებში ათამაშა, მერე დებიუტი ლა ლიგაში ჰქონდა, ხოლო შემდეგ იჯარით თანაქალაურ "კასტელონში" ითამაშა. რაც შეეხება "ლევანტეს" მთავარ გუნდს, ის ამ სეზონში გუნდის მთავარი ლიდერი გახდა და ლა ლიგაში დაბრუნებისკენ მიმავალ გზაზე ეხმარება. "ლევანტეს" მაისურით ყველა ტურნირზე მის აქტივში 57 მატჩში გატანილი 9 გოლი და 4 საგოლე პასია, საქართველოს ნაკრებში კი 19 შეხვედრაში 3 გოლი და 3 საგოლე პასი.
სხვა სტატიები
