ტრაბზონსპორი 17 წლის ქართველ ტალანტს აკვირდება

გასული წლების განმავლობაში, თურქეთის სუპერ ლიგის წარმომადგენელი გუნდების მხრიდან, ქართველი, განსაკუთრებით კი ახალგაზრდა ფეხბურთელების მისამართით ინტერესი გაიზარდა.

ამჯერად, "ტრაბზონსპორი", რომელსაც უახლოეს პერიოდში არაერთი ქართველი ფეხბურთელის გადაბირება სურდა, "დინამო თბილისის" აკადემიის მორიგი წარმომადგენლის დამატებას ცდილობს.

ტრაბზონელთა ინტერესთა სფეროში 17 წლის ფეხბურთელი, ნიკოლოზ ჩიქოვანი მოექცა. ამ ქვეყნის მედიის ინფორმაციით, შავიზღვისპირული გუნდის სასკაუტო სისტემის რადარზე "დინამო თბილისის" ფლანგის შემტევი მოექცა.

"1.88 სმ სიმაღლის მქონე მარცხენა ფლანგის გარემარბს ქართველები ახალ ხვიჩა კვარაცხელიას უწოდებენ, რომლის დამატებასაც "ტრაბზონსპორი" შეეცდება", - წერს fotomac.

ნიკოლოზ ჩიქოვანი "დინამო თბილისის" აკადემიიდან "დინამო 2-ში" 2024 წელს დააწინაურეს, 2025 წლის სეზონიდან კი უკვე მთავარ გუნდშიც ხვდება და ეროვნული ლიგის ამ სეზონში სამ მატჩში ითამაშა. საქართველოს 17-წლამდელთა ნაკრებში ნიკოლოზ ჩიქოვანს თამაშის ფართო გამოცდილება აქვს და 2-ჯერ მეტოქის კარის დალაშქვრაც მოახერხა, ხოლო 19-წლამდელთა ნაკრების შემადგენლობაში ელიტ-რაუნდში მონაწილეობა მიიღო და ოთხ ჩატარებულ შეხვედრაში ერთხელ გოლის გატანაც მოახერხა.