ისრაელის ქალაქ თელ-ავივში, 20 თებერვალს, თელ-ავივის გრანდ სლემის დასკვნითი საშეჯიბრო დღე აიღებს სტარტს, სადაც საქართველოს ნაკრების ღირსებას 6 ფალავანი დაიცავს.
-90 კგ
-90 კგ წონით კატეგორიაში ჩვენი ნაკრების ერთ-ერთი გამორჩეული ვარსკვლავები იჭიდავებენ: ბექა ღვინიაშვილი და ლაშა ბექაური.
რათქმა უნდა, ორივე მათგანი განთესილია, რაც იმას ნიშნავს, რომ ორივე ფალავანი ასპარეზობაში მეორე ეტაპიდან ჩაერთვება. ლაშა ბექაური D ბადეში იასპარეზებს, სადაც მისი მეტოქე მეორე ეტაპზე, ისრაელის წარმომადგენელი - ბენ ტენენბაუმი იქნება. თუ ბექაური მეტოქეს დაამარცხებს და შემდეგ ეტაპზე გავა, იგი ნიდერლანდელ - იესპერ სმინკსა და გერმანდელ - ტიმ შმიდტს შორის გამარჯვებულს დაუპირისპირდება.
რაც შეეხება ბექა ღვინიაშვილს, როგორც უკვე აღვნიშნეთ, ღვინიაშვილიც განთესილია და ასპარეზობაში მეორე ეტაპიდან ერთვება. მისი მეტოქე, ყირგიზი - ერლან შეროვი იქნება. ყირგიზული ბარიერის დაძლევის შემთხვევაში კი ბრიტანელ - მაქს სტიუვარდსა და დომინიკის რესპუბლიკის წარმომადგენელ - რობერტ ფლორენტინოს შორის გამარჯვებულს შეხვდება.
თუ ორივე ქართველი ნახევარფინალამდე მივა, ქართული ნახევარფინალი შედგება.
-100 კგ
-100 კგ წონით კატეგორიაში დებიუტი ექნება ილია სულამანიძეს, მასთან ერთად კი ამ წონაში საქართველოს ნაკრების ღირსებას - ონისე სანებლიძე დაიცავს. ორივე ქართველი განთესილი იქნება და ასპარეზობას მეორე ეტაპიდან დაიწყებენ.
ონისე სანებლიძე მეორე რაუნდში სერბ - ალექსანდრ კუკოლს დაუპირისპირდება, სერბის დამარცხების შემთხვევაში კი მისი მეტოქე, აზერბაიჯანელ - ელმარ გასიმოვსა და შვედ - ხოაკიმ დვარბს შორის გამარჯვებული იქნება.
რაც შეეხება ილია სულამანიძეს, რომლისთვისაც თელ-ავივის გრანდ სლემი, უფროსებში სადებიუტოა, ასპარეზობას მეორე რაუნდიდან დაიწყებს და ბულგარელ - დანიელ დიჩევს დაუპირისპირდება. ბულგარული ბარიერის გადალახვის შემთხვევაში კი მისი მეტოქე, ირლანდიელ - ბენჟამინ ფლეტჩერსა და სერბ - ბოიან დოსენს შორის გამარჯვებული იქნება.
+100 კგ
+100 კგ წონით კატეგორიაშიც ორი წარმომადგენელი გვეყოლება: მსოფლიოს ჩემპიონი - გურამ თუშიშვილი და გელა ზაალიშვილი.
გურამ თუშიშვილი განთესილი იქნება და მეორე ეტაპიდან იასპარეზებს, სადაც მისი მეტოქე, სლოვენიელ - ვიტო დრაგიჩსა და ისრაელის წარმომადგენელ - ევგენი შმაჩლინს შორის გამარჯვებული იქნება.
რაც შეეხება გელა ზაალიშვილს, გელა განუთესავი იქნება და ასპარეზობას პირველივე რაუნდიდან დაიწყებს, სადაც მეტოქედ უნგრელი - რიჩარდ სიპოჩი ეყოლება.
წინასწარი შეხვედრები თბილისის დროით 12:30, ფინალური ბლოკი კი 19:00 საათიდან დაიწყება.