საქართველოს თასზე პირველი ფინალისტი ცნობილია

საქართველოს დავით ყიფიანის სახელობის თასზე ნახევარფინალური ეტაპის საწყისი მატჩი გაიმართა და ფინალის მონაწილე გუნდი გაირკვა.

სამტრედიაში, ეროსი მანჯგალაძის სახელობის სტადიონზე გამართულ შეხვედრაში გორის დილამ ადგილობრივ სამტრედიას 2:0 აჯობა და ფინალის საგზური მოიპოვა.

მატჩის ძირითად დროში ფრე 0:0 დაფიქსირდა, ექსტრა ტაიმებში კი გორელებმა ორი უპასუხო გოლის გატანა მოახერხეს. მე-100 წუთზე ემანუელ ბოანსიმ ანგარიში გახსნა, 122-ე წუთზე კი შოთა შეყილაძემ მეორე გოლის გატანა მოახერხა და გორის დილას ფინალის საგზური გაუფორმა.

გორის დილამ საქართველოს თასის ფინალში ისტორიაში მეორედ გააღწია: 2012 წელს ზესტაფონთან გამარჯვებით მათ სადებიუტო ფინალური მატჩი მოიგეს.

გორის დილამ წელს ტიტული უკვე მოიგო: სლავა მეტრეველის სახელობის სუპერთასზე წარმატების მიღწევის შემდეგ, გუნდმა თასის ფინალის საგზური მოიპოვა და ჩემპიონატშიც იბერია 1999-თან ერთად თანალიდერია.