რუი ბორჟესი: "ქოჩორაშვილი კონკურენტუნარიანი ფეხბურთელია, მას დიდი ხანია ვაკვირდებით"
ლისაბონის "სპორტინგის" მთავარი მწვრთნელი, რუი ბორჟესი საქართველოს ნაკრების ცენტრალური ნახევარმცველის და თავისი გუნდის ახალწვეულის, გიორგი ქოჩორაშვილის შესახებ საუბრობს.
"ბრაგასთან" პორტუგალიის თასის ნახევარფინალური ეტაპის საწყისი მატჩის წინ გამართული პრესკონფერენციის დროს, რუი ბორჟესი ახალი ფეხბურთელების და მათ შორის გიორგი ქოჩორაშვილის შესახებ შეკითხვებს პასუხობს.
"ახალი ფეხბურთელის გვარს ვერ ვიტყვი, რადგან ეს ძალიან რთულია. ვფიქრობ, სჯობს სახელით, გიორგით მივმართოთ. ჩვენ ამ ფეხბურთელს რამდენიმე თვეა აქტიურად ვაკვირდებოდით და ის იმ იმიჯის მქონე მოთამაშეა, რომელიც "სპორტინგს" შეესაბამება. კონკურენტუნარიანი და ტექნიკური ფეხბურთელი, რომელსაც აქვს გოლების გატანის შესაძლებლობა. გვჯერა, რომ ის არის აქტივი, რომელიც ბევრ წარმატებას მოგვიტანს. გვქონდა შესაძლებლობა, რომ ეს ტრანსფერი განგვეხორციელებინა და ბედნიერი ვარ, რომ გიორგი დავიმატეთ", - ამბობს რუი ბორჟესი.
გიორგი ქოჩორაშვილის საფეხბურთო კარიერა "დინამო თბილისის" აკადემიაში იწყება, რასაც "იბერია 1999-ს", იმ დროს "საბურთალოს" აკადემიაში გადასვლა მოჰყვა. 2017 წელს, გიორგი ქოჩორაშვილმა იჯარით "ჟირონასა" და "პერალადას" ახალგაზრდულ გუნდებში ითამაშა. 2019 წელს, გიორგი ქოჩორაშვილი "ლევანტემ" დაიმატა, ჯერ სარეზერვო და ახალგაზრდულ გუნდებში ათამაშა, მერე დებიუტი ლა ლიგაში ჰქონდა, ხოლო შემდეგ იჯარით თანაქალაურ "კასტელონში" ითამაშა. რაც შეეხება "ლევანტეს" მთავარ გუნდს, ის ამ სეზონში გუნდის ლიდერი გახდა და ლა ლიგაში დაბრუნებისკენ მიმავალ გზაზე ეხმარება. "ლევანტეს" მაისურით ყველა ტურნირზე მის აქტივში 57 მატჩში გატანილი 9 გოლი და 4 საგოლე პასია, საქართველოს ნაკრებში კი 19 შეხვედრაში 3 გოლი და 3 საგოლე პასი.
სხვა სტატიები
