ლუკა ლოჩოშვილის მიმართ ინტერესი სერია B-ს კიდევ ერთ გუნდს აქვს

იტალიური მედიის ინფორმაციით, საქართველოს ნაკრების ცენტრალური მცველის, ლუკა ლოჩოშვილის დამატებით სერია B-ს კიდევ ერთი გუნდი ინტერესდება.

"მოდენას" შემდეგ, რომელიც იტალიური საფეხბურთო ჩემპიონატის რანგით მეორე ლიგის ცხრილის შუაში იმყოფება, ამ დივიზიონში დარჩენისათვის მებრძოლი, "სალერნიტანაც" საქმეში ერთვება.

იმის გათვალისწინებით, რომ 26 წლის ფეხბურთელის მიზანი სათამაშო პრაქტიკის გაზრდაა, გუნდის შეცვლა შესაძლოა ოპტიმალური ვარიანტი აღმოჩნდეს. ამ სეზონში, ევროპის ჩემპიონატზე საქართველოს ნაკრების ერთ-ერთ გმირს "კრემონეზეს" შემადგენლობაში მხოლოდ 8 მატჩში მონაწილეობა მოუწია, ახალ გუნდში კი სათამაშო დროის გაზრდის შანსი დიდია.

გარდა იტალიური გუნდებისა, ლუკა ლოჩოშვილის დამატების ინტერესს თურქული სუპერ ლიგის რამდენიმე. წარმომადგენელიც გამოთქვამს.

მიმდინარე სატრანსფერო პერიოდისას საქართველოს ნაკრების ერთი წევრის ტრანსფერი უკვე გაოფიციალურდა: ბუდუ ზივზივაძე "კარლსრუედან" კარიერას "ჰაიდენჰაიმში" გააგრძელებს.