გიორგი ქვილითაია ანორთოსისს ფინანსურად დაეხმარა

საქართველოს ნაკრების ცენტრალური ფორვარდი, გიორგი ქვილითაია, ყოფილ გუნდს, ფამაგუსტას ანორთოსისს ფინანსურად დაეხმარა.

თემურ ქეცბაიას გაწვრთნილი გუნდი ამჟამად ფინანსურ პრობლემებს ებრძვის, რის გამოც დახმარების ფონდი გაიხსნა, სადაც შემოწირულობები გროვდება.

ანორთოსისის კომუნიკაციების დეპარტამენტის წარმომადგენლის, სტელა მარკოუს ინფორმაციით, არისის ქართველმა ცენტრალურმა ფორვარდმა გუნდს, რომელშიც საწყისი კვიპროსული სეზონი გაატარა, 1 000 ევრო გადაურიცხა.

გიორგი ქვილითაიას კარიერის ერთ-ერთი საუკეთესო სეზონი სწორედ ანორთოსისში აქვს გატარებული, რომლის შემადგენლობაშიც 31 წლის ფეხბურთელმა 37 მატჩში 15 გოლის გატანა, 2 საგოლე პასის გაკეთება და კვიპროსის თასის მოგება მოახერხა.

ანორთოსისი 5 ტურის შემდეგ დაგროვებული 2 ქულით კვიპროსის ჩემპიონატში მე-11 ადგილს იკავებს და შემდეგ მატჩს აელ ლიმასოლთან სტუმრად გამართავს.