"დარწმუნებული ვარ, გიორგი ჩაკვეტაძე პრემიერ ლიგის მოთამაშე გახდება" - BBC-ის ჟურნალისტი

1 დღის წინ ქართული სპორტი

1 წთ

წელიწადის ის დროც დადგა როდესაც დივიზიონის სიმბოლური გუნდები უნდა დასახელდეს, "უოტფორდიდან" კი ერთადერთი ფეხბურთელი ვინც შეიძლება თერთმეტეულში მოხვდეს, გიორგი ჩაკვეტაძეა. გუნდში სხვა კარგი მოთამაშეებიც არიან, ტრავმებს რომ არ შეეშალათ მათთვის ხელი შესაძლოა ისინიც მოხვედრილიყვნენ მსგავს სიმბოლურ გუნდში, მაგრამ ჩაკვეტაძე მთელი სეზონის განმავლობაში გამორჩეული იყო, ის მუდმივად წარმოადგენდა საფრთხეს მეტოქე გუნდისთვის, გიორგის ცუდი თამაშების რაოდენობის ჩამოსათვლელად ცალი ხელიც საკმარისია.

ის ჩემპიონატს ლიდერობს ბურთით დისტანციის დაფარვის სტატისტიკაში, გიორგიმ 10 276 მეტრი დაფარა ბურთით, ხოლო მეორეადგილოსანმა "ლიდსის" ჯო როდონმა 8 427 მეტრი. ქართველი ლიდერია შეტევაში ბურთით გადასვლის მხრივად, მას ამ მხრივ 5 839 მეტრი უფიქსირდება, ხოლო მეორე ადგილზე კვლავ ჯო როდონია 5 148 მეტრით.

ეს სტატისტიკური მონაცემები აისახება სხვა უფრო მნიშვნელოვან ასპექტებზე, მისი ამ მაჩვენებლით ბევრი გარბენი საგოლე მომენტით დასრულდა, ამ მხრივ 73-ით გიორგი ჩაკვეტაძე მეორე ადგილს იკავებს, პირველზე ფინ აზიზია 77-ით.

სტატისტიკა ძალიან შთამბეჭდავია და ნათლად აღწერს იმ ფაქტს, რომ როდესაც ჩაკვეტაძე ბურთითაა ის დივიზიონში საუკეთესოა, მას მეტოქე გუნდების ხაზების გარღვევა კარგად შეუძლია და მინდვრის მესამედში მოხვედრა კარგად გამოსდის.

ტომ კლევერლიმ ის "მანჩესტერ სიტის" ფეხბურთელს, ჯეკ გრილიშს შეადარა, თუმცა მე ვფიქრობ ის ბურთს უკეთ ფლობს, ვიდრე გრილიში, ინგლისელ ფეხბურთელს რა თქმა უნდა სხვა უფრო მაღალი ტექნიკებიც გააჩნია, მაგრამ ამ კონკრეტულ ასპექტში გიორგის მე უფრო გრილიშის თანაგუნდელ სავინიოს შევადარებდი.

უფრო მაღალ დონეზე გადასასვლელად, გიორგი ჩაკვეტაძემ უფრო მეტი გოლი უნდა გაიტანოს და მეტი საგოლე გადაცემები შეასრულოს. ის ქმნის უამრავ შანსს და თქვენ ალბათ ფიქრობთ, რომ სხვა უკეთეს გუნდში ყოფნის შემთხვევაში უმაღლესი კლასის თავდამსხმელებთან მას შეიძლება მეტი საგოლე გადაცემა ჰქონდეს? ამაზე კამათი შეიძლება, მაგრამ რაზეც ნამდვილად უნდა იმუშაოს ეს გოლებია.

ასეთი ტალანტისთვის 38 დარტყმიდან 2 გოლის გატანა არასაკმარისია. შეიძლება პრობლემა, ზეწოლის დროს, დარტყმის ტექნიკა იყოს, მაგრამ კლევერლი ფიქრობს, რომ ეს უფრო ფსიქოლოგიური მომენტია, სწორედ ეს არის საკითხი რაზეც ისინი ბევრს მუშაობენ.

ჩაკვეტაძე, დარწმუნებული ვარ, პრემიერლიგის მოთამაშე გახდება, მაგრამ ის კლუბები, რომლებიც, სავარაუდოდ, ახლა მისით ინტერესდებიან გოლების სტატისტიკის გამო ყოყმანობენ, შესაძლოა სწორედ ამ სტატისტიკამ გადაწყვიტოს საბოლოოდ რომელ გუნდში გააგრძელებს ის კარიერას. რაც არ უნდა იყოს გიორგი ჩაკვეტაძეს მაინც შეუძლია ჩემპიონატის საუკეთესო თერთმეტეულში მოხვედრა. - ჯეფ დოილი - BBC-ის ჟურნალისტი

ზაალ ჩიხლაძე